Уиткофф Трамп Путин билан телефонда гаплашмоқчи эканини маълум қилди

АҚШ ва Россия президентлари Доналд Трамп ва Владимир Путин ўртасидаги телефон мулоқоти яқин кунларда бўлиб ўтиши мумкин. Бу ҳақда 16 март, якшанба куни АҚШ етакчисининг махсус вакили Стивен Уиткофф CNN телеканалида маълум қилди. «Ўйлайманки, бу ҳафта икки президент ўртасида ҳақиқатан ҳам яхши ва ижобий муҳокама бўлади», — деди у.

Уиткоффнинг айтишича, унинг шу ҳафта бошида Путин билан учрашуви ҳам «ижобий» бўлган. Вашингтон ва Москва позициялари «бир-бирига яқинлашиб бормоқда», деди у. Махсус вакилнинг таъкидлашича, у Россия президенти билан бир неча соат гаплашган ва Путин Украинада ўт очишни тўхтатиш зарурати ҳақидаги «президент Трампнинг позициясини қабул қилади» деган таассурот уйғотган. Уиткоффнинг сўзларига кўра, яқин ҳафталарда бу борада қандайдир келишувга эришилиши мумкин.

Рубио Украинадаги урушни тугатишнинг дастлабки босқичларини маълум қилди

Вашингтон Украинада ҳеч бўлмаганда қисқа муддатли ўт очишни тўхтатишни талаб қилмоқда, чунки ҳарбий ҳаракатлар давом этиши музокаралар жараёнига ҳисса қўшмайди. Бу ҳақда АҚШ Давлат департаменти раҳбари Марко Рубио 16 март куни эълон қилинган Американинг CBS телеканалига берган интервюсида маълум қилди.

АҚШнинг жорий ташқи сиёсати ҳақидаги суҳбат чоғида телебошловчи Маргарет Бреннан Доналд Трампнинг махсус элчиси Стивен Уиткоффнинг яқинда Москвага сафари ва у ерда Владимир Путин билан учрашгани ҳақида сўради. Бошловчининг таъкидлашича, Рубио аввалроқ Уиткоффнинг Россияга ташрифи натижалари Москва ўт очишни тўхтатишга интилаётганини ёки Россия президенти кечиктириш тактикасини афзал кўраётганини кўрсатишини айтган эди. Бироқ Путин тинчлик музокаралари йўлида аниқ қадам ташламади, кейинроқ Рубио Россия ташқи ишлар вазири Сергей Лавров билан музокаралар ўтказди ва бу музокаралар натижасида ҳам ҳеч қандай баёнот берилмади.

Шу фонда Бреннан Рубиодан Москва музокаралар жараёнини кечиктиришни танладими, деб сўради. Бунга жавобан АҚШ давлат котиби Россия билан музокара жараёнини муҳокама қилмаслигига ишора қилди. Унинг сўзларига кўра, Уиткоффнинг Путин билан учрашуви «ишончли» бўлди, бироқ «баъзи муаммолар бор».

«Бу жуда узун ҳарбий фронтда олиб борилаётган уч йиллик қийин уруш, жуда кўп қийинчиликлар бор. Ҳеч ким буни осон демаяпти, лекин мен ҳамма режа нима эканлигини тушунишини истайман. А режаси отишмани тўхтатиб, Б режасига ўтишимиз керак. Бунинг учун ҳаммани музокара столига ўтказиш шарт», — деди Рубио.

Шу билан бирга, Давлат департаменти раҳбарининг сўзларига кўра, Москва ва Киев ўртасидаги музокаралар тўғридан тўғри бўлиши шарт эмас. Ҳар ҳолда, «биринчи қисмдан ўтгунимизча иккинчи бўлимга ҳам кира олмаймиз», деди Рубио. «Улар бир-бирига қарата ўқ узаётган пайтда урушни абадий тугатиш тўғрисида келишиб олиш қийин ва шунинг учун ҳам президент (Трамп) ўт очишни тўхтатишни хоҳлайди», деди дипломат.