АҚШда профессор 380 млн йиллик тошқолдиқларнинг чиқиндига ташлаб юборилишига сабаб бўлган университетни судга берди

Америкалик профессор Мартин Беккер Ню-Жерси университети устидан судга арз қилди. Унинг айтишича, университет ходимларининг эътиборсизлиги туфайли 380 миллион йиллик тошқолдиқлар чиқиндихонага ташлаб юборилган, деб ёзмоқда NBC News.

Беккер ҳамкасби билан биргаликда қадимги денгиз умуртқасизларининг тошга айланган қолдиқлари ҳақида кенг қамровли монография ёзишни режалаштирган эди. Даъво аризасида қайд этилишича, профессор ушбу қолдиқларни тўплаш учун “юз соатлаб” вақт сарфлаган.

Олим лойиҳа устида ишни давом эттириш учун тўпламни ҳамкасбига жўнатиши керак эди. У намуналарнинг 80 фоизини тўққиз килограммдан йигирма етти килограммгача бўлган ўн тўққизта қутига жойлаган ва ўша куннинг ўзида уларни университет почта бўлимига етказган.

UPS транспорт компанияси 18 июн куни қутиларни олиб кетган. Бир неча ҳафтадан сўнг, Беккернинг ҳамкасби жўнатмани ҳали ҳам олмаганини маълум қилган. 20 сентябр куни олим жўнатма UPS компаниясининг фирибгарликка қарши кураш бўлимида бўлиши мумкинлигини аниқлаган.

Профессор 30 сентябр куни тўғридан тўғри компания билан боғланди. Маълум бўлишича, университет тўловларни амалга оширмагани сабабли унинг жўнатмаси ушлаб қолинган, сўнг муассасанинг буюртмаси бекор қилиниб, қутилар “Нешвиллдаги номаълум чиқиндихонага” ташлаб юборилган.

Мартин Беккер университетдан коллекция учун етказилган зарарни, шунингдек, у бошдан кечирган стресс учун тиббий харажатларни қоплашни талаб қилмоқда.