Олмаотада Ўрол Тансиқбоев асарларининг кўргазмаси очилди

Президент ёрдамчиси Саида Мирзиёева ушбу кўргазма Ўзбекистон ва Қозоғистон маданий алоқаларини янада мустаҳкамлашига умид билдирди.

Фото: Telegram / Саида Мирзиёева

Олмаотада Ўрол Тансиқбоевнинг ретроспектив кўргазмаси очилди, деб маълум қилди Ўзбекистон президенти ёрдамчиси Саида Мирзиёева.

Кўргазма Ўзбекистон Маданият ва санъатни ривожлантириш жамғармаси, Қозоғистон Абилхон Қастеев номидаги Давлат санъат музейи ҳамда икки давлат музейлари билан ҳамкорликда ташкил этилган.

“Тансиқбоев ижоди Қозоғистон билан чамбарчас боғлиқ. У бу ерда кўп ишлаган, Абилхон Қастеев билан дўст бўлган. Умид қиламанки, ушбу кўргазма маданий алоқаларимизни янада мустаҳкамлайди”, — дейди Мирзиёева.

А.Қастеев номидаги Давлат санъат музейида очилган кўргазма 1 июнгача давом этади. Рассомнинг асарлари “Ўрол Тансиқбоев: ижод сайланмасига назар” номи билан тақдим этилмоқда.

Маълумот учун, 1904—1974 йиллар оралиғида яшаб ижод қилган Ўрол Тансиқбоев рассом ва рангтасвир устаси бўлган. Унинг ўнлаб машҳур асарлари мавжуд. Тансиқбоев 1944 йилда “Ўзбекистон Республикаси халқ рассоми” фахрий унвони билан тақдирланган.