Рамзан Қодировнинг бош вазир ўринбосарлиги лавозимидан кетган қизи 3 млрд рубллик компания эгасига айланди

Чеченистон етакчисининг қизи Айшат Қодирова турли ичимликлар ишлаб чиқарувчи «Чечен минерал сувлари» компаниясининг ягона эгасига айланди. Бу ҳақда «Контур.Фокус» маълумотларига таяниб «Верстка» нашри хабар берди.

Қайд этилишича, 26 ёшли Қодирова компания эгалигини 11 март куни — Чеченистон ҳукумати раиси ўринбосарлиги лавозимидан кетганидан салкам икки ҳафта ўтиб қўлга киритган.

Айшат истеъфога чиқишини эълон қилганида, «бу иш кучли эркакка кўпроқ мос келиши»ни айтганди. «Мен бизнесдаги лойиҳалар билан шуғулланиб республикамиз фаровонлиги учун меҳнат қиламан ва ишончим комилки, ушбу фаолият орқали сиёсатдан кўра кўпроқ фойда келтира оламан», — деганди Қодирова. У 2018 йилдан бери ўзи эгалик қилиб келаётган «Фирдавс» модалар уйига қайтишини билдирган эди.

«Чечен минерал сувлари», жумладан, STOM маркаси остида лимонадлар, шарбатлар ва совуқ чойлар ишлаб чиқаради. 2023 йилда компания балансидаги активлар 3 миллиард 143 миллион рублга, даромади эса 1,4 миллиард рублга етган (охирги беш йилда икки баробардан ортиққа ошган). Ўшанда корхона Чеченистондаги энг йирик экспортчига айланган эди. «Чеченистон Республикаси сувларини «Лента», «Перекресток», «Пятерочка», «Верний» каби йирик федерал савдо марказларининг деярли барчасидан топиш мумкин», — деб ёзганди Қодиров.

«Чечен минерал сувлари» 2007 йилда ташкил этилган бўлиб, шундан буён у Аҳмат Қодиров номидаги жамоатчилик фондига тегишли эди. 2022 йил февралда — Россиянинг Украинага қарши кенг кўламли уруши бошланишидан 10 кун олдин компания Руслан Дегиев ва Бексолт Садулаев номига ўтказилган. Уларнинг ҳеч бири бизнес билан шуғулланмаган. Дегиевнинг яшаш манзили сифатида Аҳмат-Юрта — Рамзан Қодировнинг ота қишлоғи кўрсатилган.

Айшат — Қодировларнинг тўнғич фарзанди. У республика ва федерал даражадаги, шунингдек, бошқа ҳудудларнинг кўплаб мукофотларини қўлга киритган. Хусусан, 2023 йилда у II даражали «Ватан олдидаги хизматлари учун» ордени билан мукофотланган.