Зеленский ва Трамп телефон орқали мулоқот қилди

АҚШ президенти Доналд Трамп Украина президенти Владимир Зеленский билан телефон орқали мулоқот қилди, деб хабар берди Оқ уй маъмурияти раҳбари ўринбосари Дэн Скавино.

У «ҳозир президент Трамп Овал кабинетда Украина президенти Владимир Зеленский билан телефон орқали гаплашмоқда», деб ёзди.

Трампнинг ўзи кейинроқ бир соатча давом этган суҳбат «жуда яхши» якунлаганини айтди.

«Муҳокамаларнинг аксарияти Россия ва Украинанинг сўров ва эҳтиёжларини мувофиқлаштириш бўйича президент Путин билан кечаги суҳбатга асосланган эди. Биз тўғри йўлдамиз ва мен Давлат котиби Марко Рубио ва Миллий хавфсизлик бўйича маслаҳатчи Майкл Уолцдан муҳокама қилинаётган мавзуларнинг аниқ тавсифини беришни сўрайман. Бу баёнот тез орада эълон қилинади», деб ёзди Трамп.

Бир кун аввал Трамп Путин билан икки соатдан кўпроқ давом этган суҳбатни ўтказди. Учрашувдан сўнг Кремль Путин Украина энергетика секторига зарба беришдан 30 кунлик воз кечишни қўллаб-қувватлаганини ва ҳарбийларга тегишли буйруқ берганини маълум қилди. Шунингдек, бу суҳбатда Путин Ғарбнинг Украинага ҳарбий ёрдамини тўхтатиш ва Киев билан разведка маълумотлари алмашишни тинчликнинг асосий шарти деб атади.

Оқ уй баёнотида айтилишича, президентлар «Украинада тинчлик ва ўт очишни тўхтатиш зарурлигини муҳокама қилган» ва «бу можаро мустаҳкам тинчлик билан якунланиши кераклигига келишиб олган».

Зеленский Трамп ва Путин суҳбатидан сўнг Украина энергетика инфратузилмасига ҳужумларни тўхтатиш таклифини қўллаб-қувватлашини, бироқ у Трамп билан суҳбатга умид қилаётганини, суҳбат давомида Россия билан келишувлар ҳақида батафсил маълумот олишини айтди.