Тоғ-кон саноати ва геология вазири ўринбосари тайинланди

Тоғ-кон саноати ва геология вазирига янги ўринбосар тайинланди. Бу ҳақда вазирлик матбуот хизмати хабар берди.

Фото: Тоғ-кон саноати ва геология вазирлиги

Вазирлик марказий аппарати, тизимости корхона ва ташкилотлар раҳбарлари иштирокида ўтказилган йиғилишда ташкилий масала кўриб чиқилган.

Унда Рустам Юсупов тоғ-кон саноати ва геология вазирининг ўринбосари лавозимига, Аъзам Қодирхўжаев Геология фанлари университети ректори лавозимига тайинлангани маълум қилинган.

Шу билан бирга, йиғилишда давлат раҳбари томонидан соҳага берилаётган эътибор сабаб қатор ютуқлар қўлга киритилаётгани, катта лойиҳалар амалга оширилаётгани қайд этилган.

Бундан ташқари, соҳада кадрлар тайёрлашга жиддий эътибор қаратиш зарурлиги, хорижий тажрибани ўрганган ҳолда таълимда янги марраларни забт этиш муҳим аҳамиятга эга экани, инсон ресурсларини тўғри бошқариш катта натижаларга эришишга хизмат қилиши таъкидланди.

#геология #Рустам Юсупов