Қўшимча функционаллар
-
Тунги кўриниш
Ўзбекистон Науру билан дипломатик муносабат ўрнатди
Бу борадаги тегишли коммюнике ҳар икки мамлакатнинг БМТдаги доимий вакиллари томонидан имзоланди.
Фото: Дунё
Ню Йорк шаҳрида Ўзбекистон ва Науру ўртасида дипломатик муносабатлар ўрнатиш тўғрисидаги қўшма коммюнике имзоланди.
Қайд этилишича, икки мамлакат ҳукуматлари номидан ҳужжатни Ўзбекистоннинг БМТдаги доимий вакили Улуғбек Лапасов ва Наурунинг БМТдаги доимий вакили Лара Эраб Даниел имзолаган.
Томонлар халқаро ташкилотлар, жумладан, БМТ ва унинг ихтисослашган муассасалари доирасида қўшма ҳамкорликни кучайтиришга тайёр эканликларини билдирган.
«Сиёсий, савдо-иқтисодий ва маданий-гуманитар соҳаларда ҳамкорликнинг ўзаро манфаатли йўналишларини топиш учун икки томонлама алоқаларни фаоллаштириш бўйича келишувга эришилди. Ҳужжатнинг имзоланиши Ўзбекистон билан хорижий давлатлар ўртасидаги ҳамкорликни фаоллаштиришда муҳим қадам бўлди», — дейилади хабарда.
Шу тариқа, Науру Ўзбекистон билан дипломатик муносабатлар ўрнатган 159-давлат бўлди. Бундан олдин Ўзбекистон феврал охирларида Суринам билан дипломатик муносабат ўрнатган эди.
Маълумот учун, Науру Тинч океаннинг жануби-ғарбий қисмидаги оролда жойлашган давлат. Майдони 21 квадрат километрни, аҳолиси эса 12,3 минг кишини ташкил этади.
