Олимлар об-ҳавони тезроқ ва аниқроқ башорат қилиш усулини ишлаб чиқди

Aardvark Weather сунъий интеллекти об-ҳавони анъанавий усулларга нисбатан анча тезроқ ва аниқроқ башорат қила олади. Бу ҳақда The Guardian газетаси Nature журналида чоп этилган тадқиқотга асосланиб хабар берди.

Ҳозирда метеорологлар об-ҳавони прогноз қилиш учун мураккаб алгоритмлардан фойдаланади. Буларни суперкомпютерларда қайта ишлаш соатлаб вақт олади. Бундан ташқари, ушбу тизимларни ишлаб чиқиш учун бутун бошли мутахассислар жамоаси зарур.

Кембриж университети олимлари Алан Тюринг институти, Microsoft Research ва Европа ўрта муддатли об-ҳаво прогнозлари маркази билан ҳамкорликда янги ёндашувни тақдим этди.

Улар нейротармоқни об-ҳаво станциялари, сунъий йўлдошлар, аэростатлар, кемалар ва самолётлардан олинган маълумотларни таҳлил қилишга ўргатди. Бу эса анъанавий моделлаштириш усулларидан фойдаланмасдан туриб, об-ҳаво прогнозларини олиш имконини беради.

Тадқиқотчиларнинг айтишича, сунъий интеллект ёрдамида бир нафар мутахассис оддий компьютерда аниқ прогнозлар тузиши мумкин. Кембриж университетининг сунъий интеллект бўйича профессори Ричард Тернер таъкидлашича, бу технология прогнозларни Африкадаги қишлоқ хўжалигидан тортиб Европадаги шамол энергетикасигача бўлган муайян вазифаларга мослаштириш имконини беради.

Бундан ташқари, Aardvark Weather тизими об-ҳавони саккиз кун олдиндан башорат қила олади, замонавий усуллар эса фақат беш кунлик башоратни таъминлайди. Ишлаб чиқарувчиларнинг таъкидлашича, ушбу тизим алоҳида ҳудудлар учун ҳам аниқ об-ҳаво маълумотларини тақдим этиш имкониятига эга.