Словакия яна Фицо курсига қарши кўп минг кишилик намойишлар бўлиб ўтди

21 март, жума куни минглаб одамлар Братислава ва Словакиянинг бошқа шаҳарларида мамлакат бош вазири Роберт Фицонинг россияпараст сиёсати ва авторитар тенденцияларига қарши норозилик билдириш учун кўчаларга чиқди. Намойишчилар Словакия ҳукуматини истеъфога чиқишга чақирди.

«Вазият ўта оғир» — бу сўзлар Братиславадаги норозилик трибунасидан янгради, дея хабар беради dpa агентлиги. Мамлакатнинг иккинчи йирик шаҳри Кошицада нутқ сўзловчи Словакия мудофаа вазири Роберт Калинакни Россияга таслим бўлганликда айблади.

Митинглар яна Украина қуролли кучларига ўқ-дорилар учун пул йиғувчи «Украинага тинчлик» фуқаролик уюшмаси томонидан уюштирилди. Фаоллар, хусусан, Фицони Киевга қурол етказиб беришни тўхтатгани учун танқид қиляпти. Ҳукумат эса Украинага миналардан тозалаш ускуналари ва электр генераторларини юбориш орқали ёрдам беришда давом этишини таъкидламоқда. Бундан ташқари, Словакия Россиянинг ўққа тутиши туфайли ишлаб чиқариш пасайганида Украинани электр энергияси билан таъминлаётгани хабар қилинган.

Словакияда яна Фицо ва Россия билан дўстона муносабатга қарши намойишлар бўлиб ўтди

Минглаб одамлар Словакияда бош вазир Роберт Фицонинг россияпараст сиёсати туфайли истеъфосини талаб қилиб, яна бир бор намойишга чиқди. Намойишчилар Украина ва Словакиянинг Европа танловини қўллаб-қувватладилар, деб хабар берди Словакиянинг Aktuality ахборот портали 7 март куни.

Унга кўра, «Словакия – Европа» умумий шиори остида акциялар 40 дан ортиқ, жумладан, хорижий шаҳарларда ҳам бўлиб ўтди. Словак диаспоралари чет элда, масалан, Прага ва Амстердамда намойишлар ўтказди.

Братиславадаги митингда 9-11 минг киши қатнашди. Кошица шаҳрида — 15 минггача. Банска-Бистрица шаҳрида — 3-4 минг. Одамлар Европа Иттифоқи ва НАТО байроқларини кўтариб юришган. «Россия империализмини тўхтатинг», деб ёзилган шиорлардан бирида.