Трампга ўқ узилганда Путин унинг ҳақига дуо қилган – Уиткофф

Россия президенти Владимир Путин АҚШ президенти Доналд Трампга унинг портретини совға қилди ва суиқасд уюштирилганда ҳақига дуо қилганини айтди. Бу ҳақда Трампнинг махсус вакили Стив Уиткофф журналист Такер Карлсонга берган интервьюсида маълум қилди.

Суҳбат чоғида Уиткофф Путинни ёмон одам деб ҳисобламаслигини таъкидлади. Унинг фикрича, урушга фақат бир киши эмас, балки бир қанча омиллар сабаб бўлган.

Уиткоффнинг эслашича, Россияга иккинчи ташрифи «шахсий даражада» бўлган, чунки учрашув чоғида Путин унга россиялик рассом томонидан чизилган Трамп портретини топширган ва уни Америка президентига етказишни сўраган. Бундан ташқари, Путин суиқасд уюштирилганда Трамп учун дуо қилганини айтган.

«У АҚШ президенти бўлгани ёки бўлиши мумкинлиги учун эмас, балки унинг дўсти бўлгани учун ҳақига дуо қилди. У дўсти учун дуо қилди... Уйга қайтгач, бу хабарни президентга етказдим ва портретни бердим. Шубҳасиз, бу унга таъсир қилди», деди Уиткофф.

Махсус вакилнинг айтишича, бу «меҳрли ишора» Трамп ва Путин ўртасидаги «алоқа»ни тиклади.

У шунингдек, Россия ва Украина можаросининг асосий масаласи – Қрим ва Донбасснинг мақоми эканини таъкидлаган.

«Улар русийзабон, у ерда референдумлар ўтказилган ва аҳолининг мутлақ кўпчилиги Россиянинг бир қисми бўлишни хоҳлашини билдирган. Бу масала ҳал бўлгач, биз жуда ижобий суҳбатлар олиб борамиз. Бу ҳар доим муаммо бўлган, лекин бу ҳақда ҳеч ким гапирмаган. Россияликлар бу ҳудудларни де-факто назорат қилмоқда. Савол шундаки, дунё булар Россия ҳудудлари эканини тан оладими?

Зеленский тан олса, сиёсий жиҳатдан омон қола оладими? Зеленский Украина НАТОга аъзо бўлмаслигини тушунади», деган Уиткофф.

У шунингдек, Украина учун хавфсизлик кафолатлари муҳокамаси очиқлигича қолаётгани, Украинада президентлик сайловлари ўтказилиши, Киевдагилар аллақачон бунга рози бўлишгани, келгуси ҳафта давомида Россия ва Украина Қора денгизда денгиз зарбаларига мораторий жорий қилиши, мунтазам амал қиладиган сулҳ унчалик узоқ эмаслиги, Путин – супер ақлли одам экани, НАТО руслар бутун Европани босиб ўтишига йўл қўймаслиги, Путин ва Трамп яқин ойларда учрашишини айтиб ўтган.