ХОҚ раҳбари ҳарбий можаролар туфайли ўйинлардан четлатишга қарши чиқди

Кирсти Ковентрининг фикрича, ХОҚ учун энг яхшиси барча спортчиларнинг ўйинларда иштирок этишини таъминлашдир. Шунингдек, у Россиянинг Олимпиадада тўлиқ иштирок этишига қайтиш масаласи ишчи гуруҳ томонидан муҳокама қилинишини таъкидлади.

Фото: AP

Халқаро олимпия қўмитаси (ХОҚ)нинг янги президенти Кирсти Ковентри Sky News телеканалига берган интервюсида ҳарбий можаролар туфайли мамлакатларнинг Олимпия ўйинларидан четлаштирилишига қарши эканини айтди.

Бир кун аввал ХОҚнинг 144-сессиясида сузиш бўйича икки карра Олимпия чемпиони Ковентри ташкилотнинг янги президенти этиб сайланди. 41 ёшли зимбабвелик лавозимига 24 июн куни киришади.

«Мен бунга қаршиман, лекин ҳар бир вазиятни алоҳида кўриб чиқиш керак деб ўйлайман. Мен можароларга дуч келганимизда қарор қабул қилишда фойдаланишимиз мумкин бўлган қоидалар ва кўрсатмаларни ишлаб чиқишга ҳаракат қиладиган ишчи гуруҳ яратмоқчиман», деди Ковентри.

Унинг таъкидлашича, Африкада ҳам даҳшатли можаролар мавжуд ва бу муаммо ҳал қилинмаяпти.

Ковентрининг таъкидлашича, ХОҚнинг масъулияти Олимпия ўйинлари пайтида спортчилар хавфсизлигини таъминлаш, уларни ҳимоя қилиш ва қўллаб-қувватлашдир. «Демак, яхши мувозанат бор. Аммо охир-оқибат, менимча, бизнинг ҳаракатимиз барча спортчиларнинг вакили бўлишдан иборатдир», дея қўшимча қилди у.

#ХОҚ #Кирсти Ковентри