Хушбоқ Раҳимов ва Тиан Шучун «Дўстлик» ордени билан мукофотланди

Шоир ва маънавият тарғиботчиси Хушбоқ Раҳимов президент фармонига кўра «Дўстлик» ордени билан мукофотланди.

«Кўп йиллик самарали бадиий-ижодий фаолияти билан замонавий адабиётимизни ватанпарварлик, фидойилик, инсонийликни тараннум этувчи асарлар билан бойитиш, халқимизнинг онгу тафаккури, маънавий салоҳиятини юксалтириш, фарзандларимизни Ватанга муҳаббат ва садоқат руҳида тарбиялашга қўшган муносиб ҳиссаси, юртимиздаги туб ислоҳотлар моҳиятини жамоатчиликка етказиш, жамиятда миллатлараро дўстлик ва тотувликни, турли миллат ва элат вакиллари ўртасида ўзаро ҳамжиҳатлик, меҳр-оқибат муҳитини мустаҳкамлаш, миллий маданиятлар ва анъаналарни ривожлантириш борасидаги катта хизматлари ҳамда ижтимоий ҳаётдаги фаол иштироки учун шоир, маънавият тарғиботчиси Раҳимов Хушбоқ «Дўстлик» ордени билан мукофотлансин», дейилади фармонда.

Шунингдек, хитойлик Тиан Шучун ҳам «Дўстлик» ордени билан мукофотланди.

«Ўзбекистон Республикаси ва Хитой Халқ Республикаси ўртасидаги савдо-иқтисодий алоқаларни мустаҳкамлаш, икки томонлама манфаатли шерикликни ривожлантириш, мамлакатимиз иқтисодиётига хорижий инвестицияларни фаол жалб этишга қўшаётган муносиб ҳиссаси, юртимизда олиб борилаётган улкан бунёдкорлик ишларини янада жадаллаштириш, замонавий қурилиш-архитектура ҳамда савдо ва хизмат кўрсатиш соҳаларида истиқболли ва инновацион лойиҳаларни муваффақиятли амалга ошириш, янги иш ўринларини яратиш борасидаги катта хизматлари учун «TSC HK Investment» масъулияти чекланган жамияти таъсисчиси Тиан Шучун Ўзбекистон Республикасининг «Дўстлик» ордени билан мукофотлансин», дейилади фармонда.