Ўзбекистон ва Баҳрайн талабалар алмашинуви дастурларини йўлга қўяди

Ўзбекистон ва Баҳрайн ўртасида олий таълим соҳасидаги ҳамкорлик жадаллаштирилади.

Фото: "Дунё" АА

Манама шаҳрида Тошкент давлат шарқшунослик университети делегацияси ҳамда Кўрфаз минтақасининг энг нуфузли олий таълим муассасаларидан бири – Баҳрайн университети раҳбарияти ўртасида музокаралар бўлиб ўтди.

Ўзбекистоннинг Саудия Арабистонидаги элчихонаси маълумотига кўра, учрашув чоғида биргаликда илмий лойиҳаларни амалга ошириш, таржима соҳасида ҳамкорлик қилиш, профессор-ўқитувчилар ва талабалар алмашинуви дастурларини йўлга қўйиш ва илмий конференцияларни ташкил этиш масалалари муҳокама қилинди.

Томонлар икки олий таълим муассасаси ўртасидаги академик алоқаларни жадаллаштиришга қаратилган англашув меморандуми бандларини кўриб чиқдилар ва уни келгусида имзолаш бўйича келишувга эришдилар.