Пентагон 75 мингдан ортиқ ходимни ишдан бўшатишга тайёрланмоқда

АҚШ Мудофаа вазири Пит Ҳегсет ҳукуматнинг харажатларни камайтириш мақсадига эришиш учун вазирликдаги фуқаролик ходимлари сонини қисқартириш бўйича меморандумни имзолади, деб хабар берди Bloomberg.

Пентагонда 950 мингга яқин фуқаролик ходимлари ишлаяпти. Режага кўра, уларнинг 5-8 фоизи ишдан бўшатилиши керак, бу 75 минг ходим демакдир.

АҚШ Мудофаа вазирлиги жараён натижасида фуқаролик лавозимлари сони тўлиқ вақтли лавозимларга тенг бўлишини маълум қилди. Шу билан бирга, ҳарбий идора баёнотига кўра, вазир томонидан имзоланган меморандумда департаментдаги ишдан бўшатишнинг мақсадли фоизи кўрсатилмаган.

Пентагон февраль ойида фуқаролик ходимларнинг 8 фоизини ишдан бўшатиш режаларини эълон қилди ва Ҳегсет президент Доналд Трампнинг федерал ишчилар сонини қисқартириш кампаниясига қўшилиш истагини яна бир бор тасдиқлади.