Трамп Финландиядан музёрар кемалар сотиб олмоқчи

Александр Стубб ва Доналд Трамп АҚШ ва Финландия ўртасидаги ҳамкорликни кенгайтиришга келишиб олди. Мавзулардан бири АҚШнинг Арктикадаги таъсирини кучайтириш учун музёрар кемалар сотиб олиши бўлди.

Фото: REUTERS / U.S. Coast Guard / Charly Hengen

Финландия президенти Александр Стубб 29 март, шанба куни Флоридада АҚШ президенти Доналд Трамп билан норасмий тарзда учрашув ўтказди. Икки давлат етакчилари икки томонлама ҳамкорликни кучайтириш, Украинадаги урушни муҳокама қилди ҳамда голф ўйнади. Учрашув Америка етакчисига тегишли Trump International Golf Club голф клубида бўлиб ўтди.

Музокараларнинг муҳим мавзуларидан бири Арктикадаги таъсирини кучайтириш учун АҚШ томонидан кутилаётган музёрар кемаларни сотиб олиш бўлди. «Президент Стубб ва мен Қўшма Штатлар ва Финландия ўртасидаги ҳамкорликни мустаҳкамлашни, жумладан, Қўшма Штатлар учун жуда зарур бўлган кўплаб музёрар кемаларни сотиб олиш ва ишлаб чиқилишини интиқлик билан кутамиз, бу бизнинг мамлакатларимиз ва бутун дунё учун тинчлик ва халқаро хавфсизликни таъминлайди», — деб ёзди Трамп ўзининг Truth Social платформасида.

Трампнинг Стубб билан учрашуви АҚШ вице-президенти Жей Ди Вэнс Шимолий Европада Финландиянинг яқин иттифоқчиси бўлган Дания автоном ҳудуди бўлган Гренландиядаги Питуффик АҚШ ҳарбий базасига ташриф буюрганидан бир кун ўтиб содир бўлди. Вэнс Данияни Гренландияни етарлича ҳимоя қила олмаганликда айблади. Агар АҚШ Гренландияга қизиқиш билдирмаса, минтақадаги иштирокини кенгайтираётган Россия ва Хитой буни қилади, деди у.

Дания АҚШ вице-президентининг Гренландия бўйича танқидини рад этди

Дания бош вазири Метте Фредериксен АҚШ вице-президенти Жеймс Дэвид Вэнснинг қироллик Гренландия халқи учун яхши иш қилмагани ва Арктика минтақаси хавфсизлигига жуда кам сармоя киритгани бўйича айбловини рад этди. Хавфсизлик масаласида Дания «америкаликлар билан кеча-ю кундуз ҳамкорлик қилишга» тайёр, деб таъкидлади Фредериксен 29 мартга ўтар кечаси.