Урушдаги мутлақ рекорд: март Россия артиллерияси учун «қора ой» бўлди

Ҳарбий таҳлилчи Александр Коваленконинг маълум қилишича, 29 март ҳолатига кўра, Россия қуролли кучларининг тўп артиллериясидаги йўқотишлар сони 1543 та бирликни ташкил этган. Россия охирги уч йил ичида ҳеч қачон бундай миқдорда артиллерия воситаларини йўқотмаган.

«Ой тугашига ҳали икки кун бор, аммо аллақачон мутлақ рекорд қайд этилди», — деб ёзди мутахассис.

У шунингдек, Россия қуролли кучларининг автомобил транспортидаги йўқотишлари ҳам рекорд даражага яқинлашганини таъкидлади. Феврал ойида Россия 3472 та автотранспортидан айрилган бўлса, мартнинг 29 кунида бу кўрсаткич 3297 тани ташкил этди.

Коваленконинг таъкидлашича, артиллерия ва автотранспортдаги йўқотишлар ўзаро боғлиқ. Бу, биринчи навбатда, Россия қўшинлари томонидан штурм ҳаракатларига ўт кучини таъминлаш зарурати, махсус зирҳли техника ва асосий жанговар танклар етишмаслиги, шунингдек, қисқа масофали тўплар сонининг ортиши билан изоҳланади.

Бу орада Forbes нашри Россия фронтга 80 йиллик юк машиналарини жалб қилаётгани ҳақида мақола эълон қилди.

Катта миқёсдаги техника йўқотишлари ортидан россияликлар фронтда ГАЗ-69 юк машиналарини ишлата бошлаган — бу Россияда Иккинчи жаҳон урушидан кейинги илк йўлтанламас юк машиналаридан бири бўлиб, 1940-йилларнинг охирида ишлаб чиқилган.

Forbes нашри кузатувчиси Дэвид Акснинг ёзишича, ушбу юк машиналарининг илк намунаси 1952 йили Молотов заводи конвейеридан чиққан, охирги модификацияси эса 1972 йилда ишлаб чиқилган. Ҳозир эса ана шу 80 йиллик конструкция Украинадаги урушда қатнашётган сўнгги транспорт турларидан бирига айланган.

Таҳлилчининг таъкидлашича, бунинг ўзиёқ Россия армиясининг демеханизацияланишга дучор бўлгани, яъни замонавий ҳарбий техникаларнинг етишмаслигидан далолат беради. Уруш давомида Россия бронетехника ва оғир транспорт воситаларидаги йўқотишлари 20 мингдан ошган. Солиштириш учун: айни кунларда бутун Британия армиясида 18 мингга яқин техника мавжуд.

«Россияликлар янги ишлаб чиқариш ёки захирадан эски машиналарни олиб чиқиш орқали йўқотишларни қоплай олмаётгани сабабли, улар фақат логистика учун эмас, балки украин позицияларига бевосита ҳужумларда ҳам фуқаролик транспорт воситаларидан тобора кўпроқ фойдаланмоқда», — дейди Акс.

Бундай фуқаролик техникалари миналар, артиллерия, дронлар ва ракеталарга қарши янада ожиз. Яқиндаги тадқиқотга кўра, Россиянинг умумий йўқотишларининг тахминан 70 фоизини зирҳсиз юк машиналари, минивенлар, енгил автомобиллар, фургонлар ва ҳатто голфкарлар ташкил этмоқда. Бу эса ўз навбатида, янада ноқулай транспорт турларига талабни оширмоқда — масалан, электросамокатлар, отлар ва эшаклар.

Акснинг таъкидлашича, Россия армиясининг демеханизацияланиши ҳали у ҳужумни давом эттира олмайди, дегани эмас. Чунки ҳамон россияликларда украиналикларга нисбатан кўпроқ одам ва техника бор.

«Бироқ ҳарбий жиҳатдан зарур транспорт воситаларининг йўқотилиши Россия кучларини чеклайди. Аниқ шароитларда демеханизацияланган россия полклари украин бригадаларини сиқиб чиқариши мумкин. Аммо амалда бундай ёриб ўтувчи полклар Украина мудофаа чизиғида юзага келган ёриқлардан фойдалана олмайди», — дея хулоса қилади таҳлилчи.