Аргентина президенти бизнесменлар билан кечки овқатларда учрашиш учун 20 минг долларгача пул олган — Bloomberg

Аргентина президенти Хавер Милей 2021-2023 йилларда конгрессмен сифатида ўзи билан кечки овқатда иштирок этишни хоҳлаган тадбиркорлардан 20 минг долларгача пул олган. Бу ҳақда Bloomberg президентнинг ўзининг сўзларига таяниб хабар берди.

Бундай кечки овқатлар ҳар ой ташкил этилган ва уларнинг ҳар бирида ўртача 5-10 нафар бизнесмен иштирок этган. Агентлик манбаларига кўра, бизнесменлар одатда ушбу учрашув учун тўловларни нақд пулда амалга оширган, бироқ тўловларнинг ҳеч қандай қайдлари мавжуд эмас.

Таъкидланишича, бизнесменлар Аргентина сиёсатининг «янги юлдузи» билан алоқа ўрнатиш учун пул тўлашга тайёр бўлган, Хавер Милей эса бунга консултант сифатидаги фаолиятининг давоми сифатида қараган.

«Менинг вақтим қиммат, сиёсат ортидан пул ишламайман. Мен билан гаплашишни истагансиз, пул тўланг», — деган у 2023 йилги интервюсида. Bloombergʼнинг ёзишича, сиёсатчилар бошқа фаолият тури, масалан, консултациялар билан шуғулланиш ҳуқуқига эга, аммо ҳеч қаерда ҳужжатлаштирилмаган бундай тўловлар пора сифатида қабул қилиниши мумкин.

Аргентинада ўнг қанот «Озодлик келяпти» алянси бир қисми бўлган Либертарлар партиясига раҳбарлик қилувчи Хавер Милей 2023 йилда президент этиб сайланганди. Сайловолди кампанияси давомида у Россия, Хитой ва Бразилиянинг «коммунистик» ҳукуматлари билан алоқаларни узиш режасини ҳам эълон қилган.