Ҳолливуд актёри Вэл Килмер вафот этди

Америкалик актёр Вэл Килмер 1 апрел куни Лос-Анжелесда вафот этди. «Бэтмен абадий», «Дорз» ва «Топ Ган» филмлари юлдузи 65 ёшда эди.

Актёрнинг қизи Мерседес Килмер New York Times нашрига маълум қилишича, ўлим сабаби пневмония бўлган.

Килмер 1959 йил 31 декабрда Лос-Анжелесда ўрта синфга мансуб оилада таваллуд топган. 17 ёшида у Ню Йоркдаги нуфузли Жулярд мактабига кириб, академиянинг ўша вақтдаги энг ёш талабаларидан бирига айланади.

Вэл Килмер кинодаги карьерасини 1984 йилда, Жим Абраҳамс ва  ака-ука Цукерларнинг «Мутлақо махфий!» номли пародия комедиясида бош қаҳрамон – Шарқий Германиядаги фестивалда иштирок этиш учун борган америкалик рок-қўшиқчи ролини ўйнаш орқали бошлайди.

1988 йилда фэнтези жанридаги «Уиллоу» филмини суратга олиш жараёнида Килмер британиялик актриса Жоан Уолли билан танишади. Улар ўша йилиёқ турмуш қуришган. Жуфтлик 1996 йилда ажрашади, уларнинг икки фарзанди бор — Мерседес Килмер ва Жон Уоллэс «Жек» Килмер.

1991 йилда Килмер яна рок-юлдуз ролини ўйнайди, бу сафар — Оливер Стоуннинг афсонавий The Doors гуруҳи етакчиси биографияси бўлган «Дорз» филмида Жим Моррисонни. Кастингдан олдин Килмер Моррисоннинг ўнлаб қўшиқларини ўрганган ҳамда режиссёрга саҳнада 1960-йиллар юлдузи қўшиқларини қандай ижро этгани акс этган видеоёзувни олиб келган. Филмнинг ўзида актёр Моррисоннинг қўшиқларини ўзи айтган, The Doors гуруҳининг собиқ мусиқачилари эса ҳар доим ҳам Килмернинг вокалини оригиналидан ажрата олишмаганини тан олишган.

Килмер 90-йилларнинг қатор жангари филмлари, триллерлари ва вестернларида суратга тушган: «Юрак гумбурлаши» (Thunderheart, 1992), «Тумстоун: ёввойи ғарб афсонаси» (Tombstone, 1993), «Арвоҳ ва зулмат» (The Ghost and the Darkness, 1996) ҳамда «Авлиё» (The Saint, 1997). «Олишув»да (Heat,1995) у Роберт де Ниро ва Ал Пачино билан, «Доктор Моро ороли»да (The Island of Dr. Moreau, 1996) — Марлон Брандо билан бирга ишлаган.

Бироқ, Килмер учун энг машҳур рол Жоэл Шумахернинг «Бэтмен абадий» филмидаги Брюс Уэйн ва унинг алтер эгоси Бэтмен эди. Филм кассада муваффақият қозонди, аммо танқидчилар томонидан турлича баҳоланган.

Килмернинг бошқа бир таниқли роли — лейтенант Том «Айсмен» Казански «Энг яхши мерган» (Top Gun, 1986) бўлган, у Том Круз ижросидаги учувчи «Мэверик»нинг рақиби ролини ўйнаган.

«Энг яхши мерган»нинг сиквели сифатида ишланган «Топ Ган: Мэверик»да (2022) Килмернинг қаҳрамони — энди лейтенант эмас, балки адмирал, бош қаҳрамоннинг рақиби эмас, балки энг яхши дўсти сифатида бир муддат экранда кўриниш беради.

«Айсмен» бу филм сюжетида деярли гапирмайди ва кўп ўтмай саратондан вафот этади; бу — Килмернинг ўзига қўйилган ташхисга ишора эди. Актёрда 2014 йилда ҳиқилдоқ саратони аниқланганди, аммо даволанишдан кейин у тузала бошлаганди.

«Топ Ган: Мэверик» Килмернинг катта экранлардаги охирги ижроси бўлиб қолади.