Жаҳон | 20:44 / 02.04.2025
1793
4 дақиқада ўқилади

Исроил ҳарбий амалиётини кенгайтирмоқда ва Ғазода янги ҳудудларни эгалламоқчи

Исроил мудофаа вазири Исраэл Кац ҳарбийлар Ғазодаги амалиётни кенгайтириши ва ҳудуднинг «катта қисмлари»ни эгаллаб, бу ҳудудларни Исроил армияси томонидан яратилган «хавфсизлик зоналари»га қўшишини маълум қилди.

Фото: Getty Images

Вазирнинг сўзларига кўра, амалиёт кенгайтирилиши «ҳудудни террорчилар ва террорчилик инфратузилмасидан йўқ қилиш ва тозалаш»ни мақсад қилган ҳамда фаластинликларни кенг кўламли эвакуация қилишни талаб этади.

Исроил ҳарбийлари аллақачон анклав жанубидаги Рафаҳ ва Хон Юнус шаҳарлари яқинида яшовчи ғазоликларни эвакуация ҳақида огоҳлантириб, уларга аввалроқ гуманитар зона деб эълон қилинган соҳил бўйидаги Ал-Маваси ҳудудига кўчиб ўтишга кўрсатма берган.

Кац жанглар кетаётган ҳудудлар аҳолиси эвакуация қилинишини айтди, Ғазо аҳолисини Ҳамасни йўқ қилишга ва гаровга олинган исроилликларни қайтаришга чақириб, бу урушни тўхтатишнинг ягона йўли эканини таъкидлади.

Кацнинг баёнотида Исроил айнан қайси ҳудудни эгалламоқчи эканига аниқлик киритилмаган.

Исроил қўшинлари аллақачон Ғазода муҳим буфер зона яратган – урушдан олдин анклав чегаралари бўйлаб мавжуд бўлган ҳудуд кенгайтирилган ва Ғазо марказидан ўтувчи Нецарим деб аталадиган йўлакда катта хавфсизлик зонаси қўшилган.

Исроилнинг Миср билан чегараси бўйлаб шиддатли авиазарбалари ҳақида хабарлар келмоқда, бундан эса Исроилнинг Ғазода қуруқлик орқали янги йирик ҳужуми яқин вақтлар ичида бошланиши ҳақида таассурот пайдо бўлмоқда.

Reuters агентлиги қайд этишича, Исроил етакчиларини 2007 йилдан бери анклавни назорат қилиб келаётган Ҳамасга қарши норозилик аломатлари руҳлантирмоқда. Амалиётни кенгайтириш орқали Ғазо аҳолисининг гуруҳга босимини кучайтириш ҳам мақсад қилинган.

«Мен Ғазо аҳолисини Ҳамасни йўқ қилиш ва ўғирланганларнинг барчасини қайтариш учун зудлик билан ҳаракат қилишга чақираман. Бу урушни тугатишнинг ягона йўли», – деди Кац ва амалиёт орқали ҳудуд жангарилар ва уларнинг инфратузилмасидан тозаланишини қўшимча қилди.

Аввалроқ Исроил бош вазири Бинямин Нетаняҳу Ҳамасга қуролларни ташлаш ҳақидаги чақириғини такрорлаган ва ҳарбий босим қўллаш гаровда қолаётган 59 кишини қайтаришнинг энг яхши усули эканини айтганди.

Исроил ҳукумати 18 март куни Ғазога янги ҳужум бошлаган ва Ҳамасни АҚШнинг сулҳ режимини узайтириш ва Ғазода ҳамон асирликда ушлаб турилган 59 кишини озод қилиш бўйича янги таклифини рад этишда айблаганди.

Ўз навбатида, Ҳамас Исроилни январ ойида эришилган дастлабки келишувни бузишда айблади.

Гаровга олинганлар ва бедарак йўқолганларнинг оилалари форумидагилар ҳарбий амалиёт кенгайтирилиши ҳақидаги хабардан «даҳшат билан уйғонганишгани»ни айтишган. Гуруҳ ўз баёнотида Исроил ҳукуматини биринчи навбатда Ғазода қолаётганларнинг барчасини озод қилишни таъминлашга чақирди.

«Исроил ҳукумати келишув натижасида гаровга олинганларни озод қилиш ва урушни тўхтатиш ўрнига Ғазога, аввал ҳам бир неча бор жанг қилган жойларига янги қўшинларни юбормоқда», –дейилади форум баёнотида.

Сўнгги ҳафталарда Ғазодаги гуманитар вазият кескин ёмонлашди, Исроил 2 мартдан бери Ғазо секторига ёрдам юборишдан бош тортмоқда – бу уруш бошланганидан бери энг узоқ давом этган блокададир.

Ўтган ойда БМТ Ғазодаги инсонпарварлик амалиётларини қисқартиришини эълон қилганди. Бу қарор Ғазо жанубида Исроил қўшинлари фаластинлик саккиз нафар шифокор, фуқаролик мудофаасининг олти нафар ходими ҳамда БМТнинг бир нафар ходими ўлдириши ортидан қабул қилинганди.

Исроил ҳарбийлари 2023 йил 7 октябрда фаластинликларнинг рейдида 1200 га яқин одам ҳалок бўлиб, 251 киши гаровга олинишига жавобан Ҳамасни йўқ қилиш кампаниясини бошлаганди.

Ҳамас назорати остидаги Ғазо соғлиқни сақлаш вазирлиги маълумотларига кўра, сектор ҳудудидаги уруш даврида 50 мингдан ортиқ фаластинлик ҳалок бўлган.

Мавзуга оид