Тошкент шаҳар ҳокимлиги юридик бошқармаси юрисконсулти 70 минг доллар билан ушланди

Давлат хавфсизлик хизмати ҳамда Бош прокуратура ҳузуридаги Иқтисодий жиноятларга қарши курашиш департаменти ходимлари томонидан ҳудудларда коррупцион ҳолатларга чек қўйилди.

Маълум қилинишича, Тошкент шаҳар ҳокимлигининг юридик бошқармаси юрисконсулти чет эл фуқаросига тегишли бўлган кўчмас мулк давлат эҳтиёжлари учун бузилганлиги сабабли компенсация сифатида суд қарори билан давлат томонидан ажратилиши белгилаб қўйилган 8,8 млрд сўмни тезлаштириб олиб бериш эвазига 1979 йилда туғилган таниши орқали мазкур пул маблағининг 10 фоизини, яъни 70 минг АҚШ доллари талаб қилган. Акс ҳолда, суд қарори юзасидан Тошкент шаҳар ҳокимлиги номидан кассация шикояти бериб, кўчмас мулкни қайта баҳолаш йўли билан белгиланган компенсация миқдорини камайтириши мумкинлигини айтган.

Ўтказилган тезкор тадбирда воситачи хорижий фуқародан 70 минг АҚШ долларини олган вақтида ашёвий далиллар билан ушланган. 

Сўров суҳбати давомида, у бир муддат аввал юрисконсултга ўз ҳисобидан 50 минг доллар бериб қўйганлигини айтиб, яна 15 минг долларни юрисконсултга олиб бориб беришини, қолган 5 минг долларни эса ўзининг воситачилик хизмати учун олиб қолишни режалаштирганлигини маълум қилган. Сўнгра тезкор тадбир давом эттирилиб, юрисконсулт 15 минг долларни олган вақтида ушланган. 

Шунингдек, юрисконсулт муқаддам ўзининг воситачисидан олган 50 минг доллардан 10 минг долларини компенсация маблағининг ўтказилиш жараёнини тезлаштириб бериши учун Тошкент шаҳар Иқтисодиёт ва молия бош бошқармасининг бош мутахассисига берганлиги маълум бўлган. 

Юрисконсулт кўрсатмаси асосида бош мутахасисс процессуал тартибда ушланган ҳамда юрисконсулт 40 минг долларни, бош мутахассис эса 10 минг долларни ихтиёрий равишда тақдим қилган. 

“Ҳудудгаз Сурхондарё” газ таъминоти филиалининг Термиз шаҳар бўлими газ таъминоти объектларини техник тиклаш ва ишлатиш хизмати бошлиғи Косон туманида яшовчи фуқаро юк автомашинасини бошқариб кетаётиб, автотранспорт воситасининг том қисми билан табиий газ қувурига шикаст етказгани ҳолати юзасидан тузилган далолатномани йўқ қилиш ҳамда 11 млн сўм миқдорида жаримага тортмаслик эвазига ундан 400 доллар ва 500 минг сўм талаб қилган. У 3 млн 900 минг сўм ва 100 доллар олган вақтида ашёвий далиллар билан ушланган. Терговга қадар текширув давомида, у аввалроқ 500 минг сўм олганлиги ҳам маълум бўлган. 

Яна бир ҳолатда Кадастр агентлигининг Жиззах вилояти Зомин тумани бўлими етакчи инспектори 1997 йилда туғилган фуқаро ўзбошимчалик билан эгаллаб олган ер участкасида қурилиш ишларини амалга оширганлиги ҳолати юзасидан қўлланган 75 млн сўм миқдоридаги жаримани танишлари орқали камайтириб, ноқонуний қурилган турар жой биносининг ҳужжатларини расмийлаштириб бериш эвазига 400 доллар олган вақтида ушланган. 

Давлат кадастрлар палатасининг Қашқадарё вилояти Косон тумани бўлими кадастр муҳандиси эса ўз хизмат мавқейидан фойдаланган ҳолда маҳаллий фермер хўжалик раҳбари билан тил бириктириб, мансабдор танишлари орқали мазкур фермер хўжаликнинг 2 гектар сувли ер майдонини 60 млн сўмга ҳамда тегишли ҳужжатлари бўлмаган 35 сотих ер майдонини турар жой тоифасига ўзгартириб, кейинчалик эгалик ҳуқуқини берувчи ҳужжатни расмийлаштириб бериш эвазига 525 млн сўм, жами харидордан 585 млн сўм талаб қилган. У олдиндан 17 минг доллар олган вақтларида қўлга олинган.

МИБнинг Қарши шаҳар бўлими давлат ижрочиси жиноят оқибатида етказилган зарарни ундириш тўғрисидаги ижро иши юзасидан жабрланувчи фуқарога қайтарилиши лозим бўлган 554 млн сўмни унинг пластик картасига ўтказиб бериш эвазига муқаддам 2 млн сўм ва 100 АҚШ доллари олган. У қўшимча 2 млн сўм олган вақтида ушланган.

“Ҳудудий электр тармоқлари” АЖга қарашли “Энергосавдо” корхонасининг Сирдарё вилояти Ховос тумани бўлинмаси инспектори эса маҳаллий фермер хўжалик томонидан электр энергиясига ноқонуний уланиш натижасида давлат манфаатларига 14 млн сўм миқдорида етказилган зарарни йўқ қилиб, хўжаликни тармоққа қайта улаб бериш эвазига 7 млн сўм олганда қўлга олинган. 

Ҳозирда барча ҳолатлар юзасидан жиноят ишлари қўзғатилиб, тергов ҳаракатлари олиб борилмоқда.