2025 йилда 600 минг гектардан ортиқ майдонда чигиртка тарқалиши прогноз қилинган

2025 йилда Ўзбекистон бўйича 608,1 минг гектар майдонда чигиртка тарқалиши прогноз қилинган. Март-апрел ойлари чигирткага қарши кураш хизмати отрядлари учун муҳим палла бўлиб, республиканинг Қашқадарё ва Сурхондарё вилоятларида кимёвий кураш тадбирлари олиб борилмоқда.

2025 йил феврал-март ойларида 424 минг гектар майдонда кузатув-назорат ишлари амалга оширилди. Мониторинг натижалари Locust.uz ахборот дастурига киритилди. Зарарли чигирткаларга қарши кураш тадбирларини ташкил этиш ва самарали ўтказиш учун жами 42 та махсус автомашина, 181 та трактор, 69 та ОВХ-600 ва 113 та ВП-1 пуркагич, 584 та моторли қўл пуркагичлари ва 28 та сув ташувчи транспорт воситаси тайёр ҳолга келтирилди.

Зарарли чигирткаларга қарши кураш тадбирларини ўз вақтида ташкил этиш ва самарали олиб бориш мақсадида отрядларнинг дислокация харитаси ишлаб чиқилди ҳамда алоҳида мобил ишчи гуруҳлар ташкил этилди.

Қашқадарё, Сурхондарё, Самарқанд вилоятларида 22 мартдан буён 5468 гектар майдонда кимёвий кураш олиб борилди. Мазкур вилоятларда жами 30 отряд тузилиб, 276 мутахассис жалб этилган. Жиззах вилоятида ҳам кимёвий кураш тадбирлари бошланди.

Мамлакат чигирткаларнинг ривожланиши ва тарқалиши учун иқлим жиҳатидан қулай бўлиб, чигирткаларнинг тарихий ареали ҳисобланади. Ўзбекистонда 200 турдаги чигирткаларни учратиш мумкин, уларнинг тўда ҳосил қилувчи 6-8 турига қарши ҳар йили кимёвий кураш тадбирлари олиб борилади. Сабаби ҳашаротлар қишлоқ хўжалиги экинлари, саксовулзорлар ва яйловларга зарар етказиши хавфи мавжуд.

Ўсимликлар карантини ва ҳимояси агентлиги зарарли чигиртка тарқалган ҳудуд ҳақида хабардор бўлганлардан 1288 ва 71 202 28 88 рақамларига мурожаат қилишни сўраган. Кимёвий ишлов бепул олиб борилади.