Белгия ҳукумати «коррупция ва пул ювиш» жиноятлари доирасида мусодара қилинган 108 млн долларни Ўзбекистонга қайтармоқчи

2025 йил 28 март куни Брюссел прокуратураси жиноят йўли билан олинган мол-мулкларни мусодара қилиш ва бошқариш марказига (COIV) 108 миллион долларни Белгия давлат бюджетига ўтказишни сўраб мурожаат қилган. Бу маблағлар бутунлай Белгия давлатига фойдасига мусодара қилинган бўлган.

Маълум бўлишича, коррупция, телекоммуникация шартномалари тузишда ноқонуний комиссия олиш ва пул ювиш жиноятлари юзасидан ўтказилган терговдан сўнг, Ўзбекистон адлия органлари Брюссел прокуратурасига ўзаро халқаро ҳуқуқий ёрдам сўраб мурожаат қилган.

«БМТнинг Коррупцияга қарши курашиш бўйича конвенциясига асосланган ушбу расмий халқаро мурожаат асосида, Ўзбекистон ҳукуматининг илтимоси билан Белгияда жами 200 миллион доллар мусодара қилинди», дейилади прокуратура баёнотида.

Брюссел суди Европа Иттифоқига аъзо давлатлар ўртасида шу турдаги активларни бўлишиш тўғрисидаги қоидаларига асосланиб, мусодара қилинган пул ва унинг ҳисобланган фоизларини Белгия ва Ўзбекистон ўртасида тақсимланиши ҳақида қарор чиқарди. Унга кўра, суд Ўзбекистон томонига 108 миллион доллар юборишга қарор қилган.

Белгия томони расмийлари ушбу маблағлар қайси жиноят иши доирасида ҳамда кимлардан мусодара қилинганига аниқлик киритмаган.

Kun.uz Ўзбекистон Адлия вазирлигига ушбу жиноят иши ва унда мусодара қилинган активлар юзасидан сўров юборди.

2022 йилда Адлия вазирлиги Гулнора Каримова ва у бошчилигидаги уюшган жиноий гуруҳнинг Белгия қироллигида ҳам активлар жойлашгани, уларни қайтариш мақсадида, Ўзбекистон мутасадди ташкилотлари ҳамда Белгия ҳуқуқни муҳофаза қилувчи органлари ўртасида ҳамкорлик йўлга қўйилганини айтган эди.

«Белгияда тергов жараёни тугамагани сабабли (тергов сири), ушбу активлар ҳақида кўп маълумот ошкор қилиш имконияти мавжуд эмас», деганди Адлия вазирлиги расмийси. Гулнора Каримова ва унинг жиноий шериклари томонидан ноқонуний орттирилган ва Ўзбекистондан олиб чиқилган активларнинг умумий қиймати қарийб 1,3 млрд долларини ташкил этади.

Ҳозирги кунда уларни қайтариш бўйича иш олиб борилмоқда. Хусусан, Ўзбекистон ҳукумати ва Швейцария федерал кенгаши ўртасида имзоланган битимга кўра, Швейцария бош прокуратураси томонидан мусодара қилинган жами 313 миллион доллардан ортиқ маблағлар БМТнинг кўп шериклик траст жамғармаси орқали қайтарилиши бошланган.