Испания «олтин виза» беришни тўхтатди

Ушбу дастур доирасида чет эл фуқаролари 500 минг еврога кўчмас мулк харид қилиб, Испанияда яшаш ҳуқуқини қўлга киритиши мумкин эди.

Фото: Getty images

Испания ҳукумати 3 апрелдан бошлаб «олтин виза» — чет элликларга сармоя эвазига яшаш учун рухсат олиш имконини берган дастурни тўхтатмоқда. Ушбу дастур доирасида энг талабгир вариант 500 минг евродан ортиқ маблағга кўчмас мулк сотиб олиш эди, дейди мамлакат уй-жой ва шаҳарсозлик вазири Исабел Родригес.

Вазирнинг таъкидлашича, «олтин виза» беришнинг бекор қилиниши нархлар юқорилиги сабаб уй-жой харид қилолмаётган фуқароларга ёрдам беришга қаратилган.

«Ижро ҳокимияти томонидан қабул қилинган ушбу чоралар Ирландия ва Португалия каби бошқа давлатларнинг қарорларига ўхшаш бўлиб, 2022 йилда Еврокомиссия томонидан инвесторлар учун мавжуд фуқаролик тизимларини бекор қилишга оид қаттиқ тавсияларига мос келади», — дейилади хабарда.

Чет эл фуқаролари томонидан 3 апрелга қадар олинган яшаш гувоҳномалари эса муддати тугагунга қадар амалда бўлади. Янги қонун кучга киришидан олдин «олтин виза» учун берилган аризалар олдинги қоидаларга мувофиқ кўриб чиқилади.

Испанияда ушбу дастур 2013 йилдан бери амалда эди. «Олтин виза»ни Испания компаниялари акцияларига 1 миллион евро ёки давлат қимматли қоғозларига 2 миллион евро сармоя киритиш эвазига ҳам олиш мумкин бўлган, аммо энг кенг тарқалган усул кўчмас мулкка пул тикиш эди. 2023 йилда Испанияда кўчмас мулк харид қилган чет элликлар улуши рекорд даражага — 18 фоизга етган.

Эслатиб ўтамиз, 2024 йил ноябр ойида Кипр ҳукумати россиялик ва украиналик миллиардерларнинг «олтин» паспортларини олиб қўйганди. «Олтин паспорт» Кипр иқтисодиётига сармоя киритганларга берилар эди. Ўз ватанида коррупция, фитна, солиқ тўлашдан бўйин товлаш, ўзлаштириш, фирибгарлик ва пул ювиш, жиноий ташкилотда иштирок этиш ва ноқонуний қимор ўйинлари билан боғлиқ операцияларда айбланганлар бу паспортдан маҳрум этилган.

#Испания #олтин виза