«Россия оташкесимга тайёргарлик кўраётганининг аломати йўқ» — НАТО разведкаси

Альянс маълумотларига кўра, Россия армияси деярли минг километрга чўзилган фронт бўйлаб Украина қуролли кучларига босимни кучайтиришда давом этмоқда. Бу билан Россия вақт ютиб, келгусидаги эҳтимолий музокараларда устунликка эришишни мақсад қилмоқда. «Жанг майдонида россияликлар оташкесимга тайёргарлик кўраётганига доир ҳеч қандай белгилар йўқ, — деди НАТО расмийси журналистлар учун ўтказилган брифингда. — Россиянинг бу урушдаги мақсадлари ўзгарганига доир ҳам ҳеч қандай аломат кўринмаяпти».

НАТОнинг баҳолашича, жанг майдонидаги вазият Украина учун мураккаблигича қолмоқда. Россия эса устунлик ва ташаббусни сақлаб қолган. Украинада шахсий таркиб ва қурол-яроғ етишмовчилиги Россияга фойда келтирмоқда.

Алянс маълумотларига кўра, Россия армияси кун сайин 1000 нафардан ортиқ ҳалок бўлган ва яраланганлардан иборат йўқотишларга учраяпти. Уруш бошланганидан буён умумий йўқотишлар сони 900 минг кишига яқинлашган. Бироқ ҳукумат томонидан таклиф этилаётган жуда юқори бонуслар контрактчилар сафига катта оқимни таъминламоқда ва йўқотишлар ўрнини тўлдирилаяпти.

НАТО расмийсининг таъкидлашича, Россия жамияти ҳам ҳали йўқотишлар даражасини қабул қилиб бўлмас даражада, деган нуқтага етмаган. Ҳукумат эса «секин илдамлаш ортидан келаётган муваффақиятлар эвазига ҳам катта йўқотишларга тайёрлигини» кўрсатмоқда. Москва ҳаракатлари Россия раҳбарияти вақтнинг ўзи томонида, деган ишончда эканини намоён қилмоқда. «Биз Путин музокараларга яхши ниятда киришмоқда, деб ўйламаймиз», — деди НАТО вакили.

Украинанинг DeepState OSINT-лойиҳаси маълумотлари ҳам шундан далолат беради: тинчлик музокаралари бошланганига қарамасдан, Россия армияси фронтдаги ҳужумлар сонини кескин оширган. 1–26 март оралиғида РФ армияси ҳужумлар сонини феврал ойига нисбатан 17 фоизга оширган. Март ойи охирида эса кунига 200 дан ортиқ штурм амалга оширган — бу 2025 йил бошидан бери рекорд ҳисобланади. Бироқ, Россия эгаллаган янги ҳудудлар сўнгги ойлар ичида энг кичиги бўлиб қолмоқда.

Дронлар орқали амалга оширилган ҳужумлар сони ҳам март ойида рекорд кўрсаткичга етди: 18 февралда Ар-Риёдда Россия ва АҚШ ўртасида музокараларнинг илк босқичи ўтказилганидан кейинги 30 кун ичида Украина ҳудудига 4776 дрон учирилган. Бу аввалги 30 кунлик даврга нисбатан 1,5 баробар кўп.

The Moscow Times манбалари аввалроқ маълум қилганидек, Путин ҳали ҳам урушда максималистик мақсадларни сақлаб қолмоқда. Унга яқин манбаларнинг айтишича, Россия президенти АҚШ билан музокараларда Украина таркибидаги тўртта област — Донецк, Луҳанск, Запорижжя ва Херсонни уларнинг тўлиқ маъмурий чегаралари билан Россия назоратига ўтишини талаб қилмоқда. Ҳолбуки, айни пайтда бу ҳудудлардан ҳеч бири тўлиқ Россия армияси назоратида эмас.