Спорт | 17:12 / 05.04.2025
2780
2 дақиқада ўқилади

Россиялик хоккейчи афсонавий Уэйн Гретцки рекордига етиб олди

Александр Овечкин NHL доирасидаги голлар сони бўйича 1999 йилдан бери сақланиб турган рекордни такрорлади.

Фото: Washington Capitals

Россия миллий жамоаси ва Американинг «Вашингтон Кэпиталз» клуби ҳужумчиси Александр Овечкин канадалик афсонавий хоккейчи Уэйн Гретцки рекордига етиб олди.

39 ёшли россиялик 5 апрель куни Миллий хоккей лигаси (NHL) доирасидаги ўйинда «Чикаго Блэкхоукс» (5:3) дарвозасига иккита шайба киритди.

Бу Овечкиннинг 1486 та ўйиндаги 894-голи бўлди. Натижада у канадалик Уэйн Гретцкининг NHL доирасидаги голлар сони бўйича 1999 йилда ўрнатган рекордига (1487 та ўйинда 894 гол) етиб олди. Навбатдаги гол Александрни ушбу рекорднинг мутлақ соҳибига айлантиради.

Александр Овечкин хоккейчилик фаолиятини 2001 йилда Москванинг «Динамо» клубида бошлаган. 2005 йилдан буён «Вашингтон Кэпиталз» клубида ўйнамоқда.

Уэйн Гретцки хоккейчилик фаолиятини 1978 йилда «Индианаполис Рейсерз» клубида бошлаган. Кейинчалик «Эдмонтон Ойлерз», «Лос-Анжелес Кингз», «Сент-Луис Блюз» ва «Нью-Йорк Рейнжерс» клубларида ўйнаб, 1999 йилда фаолиятини якунлаган. NHL доирасида кўплаб шахсий рекордлар соҳиби ҳисобланади.

Мавзуга оид