Россия Кривий Риҳга ракета зарбаси йўллади – фотолар

19 киши ҳалок бўлган, шундан тўққиз нафари болалар. РФ мудофаа вазирлиги украин ҳарбийлари тўпланган ресторанга «юқори аниқликдаги зарба» йўлланганини хабар қилган.

РФ қуролли кучлари 4 апрел куни кечқурун Кривий Риҳ бўйлаб ракета зарбаси йўллади. Зарба турар жой кварталига тўғри келган ва кўплаб қурбонларга сабаб бўлган. Сўнгги маълумотларга кўра, зарба оқибатида ҳалок бўлганлар сони 19 нафарни ташкил этмоқда. 5 апрел куни Кривий Риҳ мудофаа кенгаши раҳбари Олександр Вилкул қурбонларнинг деярли ярми – болалар бўлганини айтди. Яна 68 киши жароҳатланган, шундан 40 нафари шифохонага ётқизилган. Шунингдек, 34 та кўп квартирали уй, олтита ўқув биноси, дўконлар, умумий овқатланиш жойи ҳамда бошқа фуқаролик инфратузилма объектлари шикастланган. Украина қуролли кучлари бош штаби маълумотига кўра, Россия максимал зарар етказиш учун кассетали ўқ-дориларга эга «Искандер М» ракетасини қўллаган. РФ мудофаа вазирлиги эса, ўз навбатида, Кривий Риҳдаги ресторанлардан бирида йиғилган украиналик ҳарбийлар устига «юқори аниқликдаги зарба» берилганини хабар қилган.

Кривий Ригга қилинган ҳужумни Украина президенти Володимир Зеленский изоҳлади. «Россия ҳар куни зарба беради. Ҳар куни одамлар ҳалок бўлмоқда. Бунинг давом этишига биргина сабаб бор: Россия ўт очишни тўхтатишни истамаяпти ва биз буни кўриб турибмиз. Буни бутун дунё кўриб турибди. Ҳар бир ракета, ҳар бир ҳужумкор дрон Россия фақат урушни хоҳлашини исботлайди», — деб ёзган Зеленский. Бир кун аввал ҳам Россиянинг ушбу шаҳарга берган ракета зарбаси оқибатида камида тўрт киши ҳалок бўлган, яна 14 киши яраланганди.