The Atlantic муҳаррири қандай қилиб Трамп жамоасининг ёпиқ чатига кириб қолгани маълум бўлди

АҚШ президентининг миллий хавфсизлик бўйича маслаҳатчиси Майк Уолц март ойида The Atlantic журнали бош муҳаррири Жеффри Голдбергни Signal мессенжеридаги Яман ҳусийчиларига ҳужум муҳокама қилинган ёпиқ чатга қўшишига бир неча ой олдин унинг телефон рақамини айфондаги ён дафтарчасида бошқа одам номи билан сақлаб олгани сабаб бўлган. Бу Оқ уй томонидан ўтказилган ички текширув давомида маълум бўлди, деб хабар берди The Guardian нашри 6 апрел куни манбаларга таяниб. Маълумотни CBS News манбалари тасдиқлаган. Оқ уй бунга изоҳ бермади.

Оқ уйнинг ахборот технологиялари бўлими томонидан ўтказилган ички тергов «2024 йилги кампания пайтида бошланган ва Уолц ўтган ойда гуруҳ чатини яратмагунча эътибордан четда қолган хатоликлар сериясини аниқлади», деб ёзади The Guardian.

Ички тергов натижаларидан хабардор манбалар айтишича, ҳаммаси Жеффри Голдберг 2024 йил октябр ойида Доналд Трампнинг сайловолди штабидан ярадор ҳарбийлар ҳақидаги сўзлари учун Трамп танқид қилинган мақолага изоҳ беришни сўраганидан бошланган.

Кейинчалик, манбаларга кўра, воқеалар қуйидагича ривожланган:

• Трампнинг сайловолди штаби Голдбергнинг хатини Трампнинг ўша пайтдаги матбуот котиби Браян Ҳюз номига юборади;
• Ҳюз Голдбергнинг хатини, жумладан, журналистнинг телефон рақами ёзилган қисмини кўчириб олади ва уни мақола тайёрланаётганидан хабардор қилиш учун Майк Уолцга юборади;
• Уолцнинг айфони эса смсда кўрсатилган Голдбергнинг телефон рақамини Браян Ҳюзнинг янги рақами сифатида сақлаб қолади.

Шундан сўнг, CBS News қайд этишича, Уолц мунтазам равишда Ҳюз билан қўнғироқлашган ва хабарлар алмашган. Шу билан бирга, Уолцнинг телефони у март ойида Саудия Арабистонининг Жидда шаҳрига келгунига қадар Голдберг ва Ҳюзнинг рақамларини чалкаштирмаган (АҚШ у ерда Россия ва Украина билан музокаралар олиб борганди). Тергов шуни кўрсатдики, Уолц ҳам, Ҳюз ҳам Голдберг билан тўғридан тўғри алоқада бўлмаган.

Уолц 13 март куни Миллий хавфсизлик кенгаши вакили лавозимини эгаллаб турган Ҳюзни Signal мессенжеридаги юқори мартабали америкалик расмийлар ҳусийчиларга ҳужумни муҳокама қилган чатга қўшмоқчи бўлади, аммо бунинг ўрнига Голдбергни таклиф қилади. Чатга Голдберг JG инициалида кирган, бироқ Трамп жамоаси аъзоларидан ҳеч бири буни пайқамаган, деди манбалар. CBS News суҳбатдошларидан бирининг сўзларига кўра, The Atlantic ўз материалини нашр этишдан бир неча соат олдин изоҳ олиш учун Оқ уйга мурожаат қилмагунча, маъмурият Голдберг махфий чатда бўлганини билмаган.

Рўй берган ҳодисадан кейин Уолц Голдберг билан бирор марта учрашмаган ва гаплашмаган. Оқ уйнинг ички тергови иштирокчилари Уолц ва Голдбергнинг қанчалик боғлиқлигини аниқлай олмаган. Голдберг The Guardian нашрига берган изоҳида шундай дейди: «Мен Майк Уолц билан муносабатларимни изоҳламоқчи эмасман, фақат уни танийман ва у билан суҳбатлашганман».

Манбаларга кўра, Доналд Трамп ички тергов натижаларини март ойи охирида олган, шундан сўнг Уолцни ишдан бўшатмасликка қарор қилган. The Guardian нашри ёзишича, Трамп «ишдан бўшатиш ҳақида узоқ ўйламаган», бироқ уни Уолц ҳарбий операцияни Signal’да муҳокама қилгани эмас, балки унда The Atlantic журналистининг телефон рақами борлиги кўпроқ ғазаблантирган. Газетанинг таъкидлашича, АҚШ президенти The Atlantic нашридан «нафратланади». Охир-оқибат, Трамп Уолцни ишдан бўшатиш режасидан воз кечади, чунки у журналистлар юқори мартабали расмийнинг истеъфосига эришдик деб ўйлашини истамасди. Трамп Уолцнинг узрини қабул қилади ва «Сигналгейт» номини олган воқеада уни ошкора ҳимоя қилади.