Трамп Хитойга ултиматум қўйди

Бу ҳақда Трамп ўзининг Truth Social ижтимоий тармоғида ёзган.

Америка президенти Хитойнинг АҚШ товарларига нисбатан 34 фоизлик миқдорида божлар жорий қилиш қароридан қаттиқ норози бўлганини билдирди.

У АҚШ шундай чораларга «илгари белгиланган божларга қўшимча равишда янги, анча юқори божлар» билан жавоб қайтарашини аввалдан айтганини эслатди.

«Агар Хитой ўзининг 34 фоизлик тариф оширишини, бу давом этиб келаётган савдо суистеъмолларидан ташқарига ўтган чорасини, эртага — 2025 йил 8 апрелгача бекор қилмаса, Америка Қўшма Штатлари 9 апрелдан бошлаб Хитойга нисбатан 50 фоизлик қўшимча божлар жорий этади», — деб ёзган Трамп.

Шунингдек, у: «Хитой томонидан биз билан учрашув сўровлари бўйича олиб борилаётган барча музокаралар тўхтатилади», деб қўшимча қилган.

Эслатиб ўтамиз, ўтган ҳафта Доналд Трамп Хитойдан АҚШга бўладиган барча импортга 54 фоиз миқдорида божлар жорий этилишини эълон қилганди — бу хорижий давлатлар орасида энг юқори кўрсаткичдир.

АҚШ президенти Доналд Трамп савдо божлари туфайли фонд бозорида юз берган пасайишларни изоҳлади. Унинг сўзларига кўра, унинг нияти бозорларни қулатиш бўлмаган, бироқ иқтисодий мувозанатни тиклаш учун айрим чораларга зарурият бўлган.

Трамп 6 апрель куни ўз самолёти саҳнида интервю бера туриб, киритилаётган божларни Хитой билан савдо дефицитини бартараф этиш воситаси сифатида тарғиб қилди. Унга кўра, АҚШ ҳар йили юз миллиардлаб доллар йўқотмоқда, токи Пекин профицитни йўқотмас экан, музокаралардан манфаат бўлмайди.

Қайд этиш жоизки, агар Трамп яна қўшимча божлар жорий этса, Хитой маҳсулотларига қўлланадиган божлар миқдори 104 фоизга ошади.