Америкаликлар Трампнинг божлари сабаб озиқ-овқат маҳсулотларини ғамлашга киришди

АҚШ аҳолиси божлар туфайли нархлар кескин ошиб кетишидан хавотирда. Шу боис улар узоқ муддат сақланадиган озиқ-овқат маҳсулотлари захирасини шакллантирмоқда.

Фото: REUTERS

Кўплаб америкаликлар Доналд Трамп томонидан жорий этилган импорт божлари АҚШда кундалик товарлар ва озиқ-овқат маҳсулотлари нархининг кескин ошишига олиб келишидан хавотирда. Шу боис улар ҳар эҳтимолга қарши ўзларига керак бўлган ёки керак бўлиб қоладиган товарларни тўплаш учун дўконларга югуришмоқда, деб ёзади The Independent.

The Foundation тадқиқот ташкилотининг баҳолашича, янги божлар америкаликларга яқин ўн йилда 3,1 триллион доллар зарар келтиради. Ва бу 2025 йилнинг ўзида ҳар бир уй хўжалигига қўшимча 2,1 минг доллар солиқ солинишига олиб келади. Yake Budget Lab таҳлил марказининг ҳисоб-китобларига кўра, Америкадаги уй хўжаликлари 2026 йилдан бошлаб ҳар йили 3,8 минг доллар кўпроқ пул сарфлашни бошлайди. Масалан, гуруч нархи яқин вақтларда 10,3 фоизга, сабзавотлар эса 4 фоизга қимматлашиши мумкин.

Ваҳимага тушаётган кўплаб истемолчиларнинг таъкидлашича, узоқ муддат сақланадиган озиқ-овқат маҳсулотларини ғамлаб қўйиш молиявий қийинчиликларни бироз енгиллаштириши мумкин. Шу боис истеъмолчилар Costco, Walmart ва бошқа дўконлар тармоқларидан тиш пастаси, совун, сув, гуруч, консервалар, зайтун ёғи, шарбатлар, ун, музлатилган пицца ва бошқа кўплаб маҳсулотлар харидини оширган.

Consumer Technology Association прогнозларига кўра, нафақат озиқ-овқат маҳсулотлари, балки технологик товарлар, жумладан, смартфонлар, ноутбуклар, ўйин консоллари нархи ҳам сезиларли даражада қимматлашади.

#АҚШ #савдо уруши #божлар