БМТ 13 мингга яқин украиналик тинч аҳоли ҳалок бўлганини тасдиқлади

Россия ва Украина ўртасидаги кенг кўламли уруш бошланганидан бери камида 12 910 нафар тинч аҳоли ҳалок бўлди, улардан 682 нафари болалар, деди БМТ Фавқулодда вазиятлар бошқармаси раҳбари.

Фото: ВПП/A. Гончарук

2022 йилнинг февралида Россиянинг кенг кўламли бостириб кириши бошланганидан 2025 йилнинг охиригача Украинада камида 12 910 тинч аҳоли ҳалок бўлди. БМТ томонидан тасдиқланган уруш қурбонлари орасида 682 нафар бола бор, деди БМТнинг Фавқулодда вазиятлар бошқармаси раҳбари Том Флетчер 8 апрел, сешанба куни Ню-Йоркда БМТ Хавфсизлик кенгашида.

Россия Федерацияси ва Украина ўртасидаги уч йилдан ортиқ давом этаётган кенг кўламли урушда деярли 30,7 минг киши жароҳат олди, дея таъкидлади у БМТнинг Инсон ҳуқуқлари бўйича бошқармаси маълумотларига таяниб. Флетчернинг таъкидлашича, ҳалок бўлганлар ва яраланганларнинг ҳақиқий сони бундан ҳам кўпроқ бўлиши мумкин.

БМТ вакили, шунингдек, Украина ва дунёдаги бошқа ҳарбий можароларда халқаро ҳуқуқ бузилаётганини эслатди. "Бу зиддиятларни бир-бирига боғлайдиган қизил ип", деди у.

Украина фуқароларининг сўнгги оммавий ҳалок бўлиши 4 апрел куни Украина президенти Володимир Зеленскийнинг туғилиб ўсган шаҳри Кривий Ригга ракета учирилиши туфайли юз берди. Оқибатда 20 киши, жумладан, тўққиз нафар бола ҳалок бўлди, 70 дан ортиқ тинч аҳоли жароҳатланди. Бирлашган Миллатлар Ташкилоти Россия армиясининг Кривий Ригга ҳужумини Украинадаги бутун урушда болаларнинг энг даҳшатли оммавий ўлдирилиши деб атади.