Илон Маск божлар сабаб Трампнинг маслаҳатчисини ҳақорат қилди

Оқ уйда божлар борасидаги можаро кескинлашди. Олдинроқ Илон Маск АҚШ президентининг тариф сиёсатидан норози бўлиши мумкинлиги ҳақида хабарлар тарқалганди. Энди эса Tesla раҳбари божлар ташаббусини илгари сурган Трампнинг маслаҳатчиси Питер Навварони ҳақорат қилди.

Афтидан, Навварога Маскнинг импорт божлари ҳақидаги фикрлари ёқмаган кўринади. CNBC каналига берган интервюсида у Tesla’ни етарлича Америка компанияси эмас деб атади.

«Аслида у [Маск] ишлаб чиқарувчи эмас, балки йиғувчи. Унинг Техасдаги заводига назар ташлайдиган бўлсак, двигателнинг катта қисми — электромобилларда бу аккумуляторлар — Япония ва Хитойдан келиши маълум бўлади. Электроника қисми Тайвандан олиб келинади. Биз хоҳлаётган ва Илондан фарқ қиладиган нарсами бу — шиналар Акрондан, узатмалар қутиси Индианаполисдан, двигателлар Флинт ва Сагинодан бўлсин. Ва автомобиллар шу ерда, АҚШда ишлаб чиқарилсин», — деган президент маслаҳатчиси.

Навваро шу орқали Маск нима учун божларга қарши чиқиш қилаётганини тушунтиришга уринган. Илон Маск Х ижтимоий тармоғи орқали унга жавоб қайтарди.

«Навваро — ҳақиқий аҳмоқ. У айтаётган нарсалар — ёлғон… Tesla Америка автомобилларини ишлаб чиқаради. Навваро бир қоп ғиштдан ҳам аҳмоқроқ», — деб ёзган Маск.

Bild’нинг ёзишича, ушбу тортишув саноат манфаатлари ва протекционистик савдо сиёсати ўртасида можаро ошиб бораётганининг ёрқин ифодаси бўла олади. Tesla каби йирик технологик компаниялар янги божлар ўзларининг ўсишига таҳдид қилишидан хавотирда.

Эслатиб ўтамиз, 2 апрел куни президент Доналд Трамп дунёнинг кўплаб давлатларига нисбатан 10-50 фоизли божлар жорий этилишини эълон қилди. Улар 9 апрелдан кучга кирмоқда. Ўз навбатида Европа Иттифоқи аъзоси бўлган давлатлар Европа комиссиясининг АҚШга нисбатан савдо аксилчоралари жорий қилиш тўғрисидаги таклифини маъқуллади.