Microsoft дунёнинг энг қиммат компаниясига айланди

Microsoft Apple акциялари қулаганидан кейин капитализацияси бўйича дунёда биринчи ўринга чиқди. 8 апрел кунги савдолар якунига кўра, Apple капитализацияси 2,59 триллион долларни ташкил этган бир вақтда Microsoftʼнинг бозор қиймати 2,64 триллион долларга етган.

Савдолар ёпилган пайтда Apple акциялари қиймати — 172,42 доллар (-4,98 фоиз), Microsoftʼники эса 354,56 долларни (-0,92 фоиз) ташкил этган. Капитализация бўйича учинчи ўринни Nvidia эгаллаган — 2,35 триллион доллар. Компания акциялари 1,37 фоизга арзонлашиб, 96,3 долларни ташкил этган. Америка фонд бозорида савдолар бошланишидан олдин учала компаниянинг ҳам капитализацияси 3 триллион доллардан ошиқ эди.

Жаҳон молия бозорининг қулаши АҚШ импорт божларини кенгайтиргани ҳисобига содир бўлмоқда. 2 апрел куни президент Доналд Трамп дунёнинг кўплаб давлатларига нисбатан 10-50 фоизли божлар жорий этилишини эълон қилди. Улар 9 апрелдан кучга кирмоқда. Шу билан бирга, Трамп Хитой учун 104 фоизли божлар жорий этди.

Трампнинг тарифларидан IT-компаниялар орасида энг кўп Apple зарар кўрди, чунки компания ўз маҳсулотларини ишлаб чиқаришда асосан Хитойга боғланган. Америка президентининг қарори фонида iPhone ишлаб чиқарувчисининг акциялари 23 фоизга қулаган — бу Apple учун 2000 йилдан бери қайд этилган энг ёмон кўрсаткич.

Bloombergʼга кўра, акциялар қиймати тушаётганига қарамай, Apple божлардан қисман фойда ҳам кўриши мумкин. Америка президенти маъмурияти импорт божлари жорий этилишини эълон қилганидан кейин Apple дўконларида iPhone сотиб олишни хоҳловчилардан иборат навбатлар пайдо бўлган. Ходимларнинг сўзларига кўра, харидорлар нархларнинг кескин ошишидан қўрқиб, «ваҳимада смартфон сотиб олмоқда».

Аввалроқ Apple компанияси март ойи охирида уч кун ичида Ҳиндистондан АҚШга бешта самолётда iPhone ва бошқа гаджетларни келтиргани маълум бўлганди.