Трампнинг ҳаракатлари нефт нархини 2021 йил февралдан буён энг паст даражага туширди — Reuters

Reuters нашрининг ёзишича, Brent маркали нефт фючерслари 1,39 долларга ёки 2,21 фоизга арзонлаб, бир баррел учун 61,43 долларни ташкил этди. West Texas Intermediate (WTI) америкалик нефт фючерслари эса 1,50 долларга ёки 2,52 фоизга тушиб, 58,08 долларга тенглашди. Иккала шартнома ҳам савдо пайтида 4 фоизгача йўқотишга учради, аммо кейинчалик бу йўқотишлар қисман тўлдирилди.

Инвесторлар нефт хомашёсига бўлган талабнинг тушиб кетиши ва таклифнинг эҳтимолий ортиши юзасидан тобора кўпроқ ташвишга тушмоқда.

«Хитойнинг тажовузкор жавоб чоралари дунёдаги икки энг йирик иқтисодиёт ўртасида келишув тез фурсатда тузилиши эҳтимолини камайтирмоқда. Бу эса глобал иқтисодий пасайиш хавфини кучайтиряпти. Агар савдо уруши узоққа чўзилса, Хитойда нефт истеъмоли кунига 50–100 минг баррелга камайиши мумкин. Бироқ ички истеъмолни рағбатлантиришга қаратилган қўшимча чоралар йўқотишларни юмшатиши мумкин», — деди Rystad Energy компаниясининг нефт товарлари бозори бўйича вице-президенти Йе Лин.

Нефт нархларидаги пасайишга ўтган ҳафтада қабул қилинган OPEC+ қарори ҳам таъсир қилди. Унга кўра, май ойидан бошлаб кунига 411 минг баррелгача қўшимча нефт қазиб чиқариш режалаштирилган. Таҳлилчиларнинг фикрича, бу қарор бозорда ортиқча таклифни юзага келтириши мумкин.