JPMorgan: Трампнинг божларни кўриб чиқиши турғунлик хавфини камайтирмади

АҚШнинг энг йирик банки JPMorgan Chase мамлакат иқтисодиёти учун салбий прогнозидан воз кечмади ва Доналд Трампнинг божлар жорий этишни кечиктириш қарорини савдо уруши «бошланишининг охири» деб атади. Бу ҳақда 9 апрел, чоршанба куни CNN телеканали банк иқтисодчилари ҳисоботига таяниб хабар берди.

JPMorgan таҳлилчилари ҳали ҳам АҚШ ва дунёда рецессия эҳтимоли 60 фоизни ташкил этишига ишоняпти. «Савдо ва ички фискал масалаларда давом этаётган сиёсий бетартиблик, шунингдек, фонд бозорларидаги катта йўқотишлар ва ишончга зарба ҳисобга олинган ҳолда, АҚШнинг рецессиядан қочишини кутиш қийин бўлиб қолмоқда», — дея CNN банк экспертларининг сўзларидан иқтибос келтирди.

Шу билан бирга, банк Трампнинг дунёнинг аксарият давлатлари учун тўлақонли божхона тўловларини жорий этишни кечиктириш ҳақидаги қарорини ижобий деб ҳисоблайди. Аввалроқ АҚШ президенти Трампнинг ушбу масала бўйича олдинги қарорига жавоб чораларини қўлламаган ва ўз жамоаси вакиллари билан «мулоқот қилган» 75 давлатга 90 кунлик муҳлат эълон қилганди.

Бироқ, Трампнинг 10 фоизлик тариф чегарасини бу давлатлар учун қолдиргани барибир «катта зарба» бўлиб, 2018-2019 йиллардаги АҚШ-Хитой савдо уруши зарбасидан 7,5 баравар кўп (унинг ташаббускори ҳам Доналд Трамп эди). «Хитойда тарифларнинг 125 фоизга кўтарилиши ҳайратланарли», деб таъкидлади банк.

«Биз ишонамизки, АҚШ савдо уруши ҳали тугамаган ва бу фақат бошланишининг охири», дея хулоса қилди JPMorgan.