Қонун кучга кирганидан 5 йил ўтгач, самарадорлиги баҳоланиши мумкин

Эндиликда қонун лойиҳалари парламентга киритилаётганда лойиҳанинг ҳуқуқий экспертизаси, коррупцияга қарши экспертизаси ва лойиҳа бўйича ўтказилган жамоатчилик муҳокамаси натижалари ҳам тақдим этилиши керак.

Ўзбекистон президенти бугун, 10 апрел куни имзолаган қонун билан айрим қонун ҳужжатларига ўзгартириш ва қўшимчалар киритилди.

Унга кўра, эндиликда қонун лойиҳаларини парламентга киритишда қуйидагилар ҳам лойиҳа билан бирга тақдим этилиши керак:

лойиҳанинг ҳуқуқий экспертизаси натижалари;
лойиҳанинг коррупцияга қарши экспертизаси натижалари;
лойиҳа бўйича ўтказилган жамоатчилик муҳокамаси натижалари.

Қонунчилик ташаббуси ҳуқуқи субъектига ўзи киритган қонун лойиҳаси иккинчи ўқишда қабул қилингунига қадар, Олий Мажлис Қонунчилик палатасига таклиф киритиш орқали уни чақириб олиш ҳуқуқи берилмоқда.

Эндиликда қонунлар кучга кирган кундан эътиборан 5 йил ўтгач, масъул давлат органларининг ва Олий Мажлис палаталари қўмиталарининг ташаббусига кўра, қонуннинг самарадорлигини, унда белгиланган мақсадга ва кутилаётган натижаларга эришилганини аниқлаш учун қонуннинг тартибга солиш таъсири баҳолашдан ўтказилиши мумкин.