Дунёнинг энг яхши аэропортлари рейтинги эълон қилинди

Буюк Британиянинг дунё авиакомпаниялари ва аэропортларини баҳолаш билан шуғулланувчи Skytrax компанияси 2025 йилнинг энг яхши аэропортлари рейтингини эълон қилди.

Дунёнинг энг яхши 20 та ҳаво бандаргоҳи ўрин олган рейтингда биринчи ўрин Сингапурдаги Чанги аэропортига насиб этди. Қайд этилишича, Чанги рейтингда 13-маротаба биринчиликни эгалламоқда. Ушбу аэропортнинг устун жиҳатларидан бири — йўловчилар багажларини парвоздан 48 соат олдин топширишлари мумкин.

Шунингдек, аэропорт инфратузилмаси ҳам алоҳида эътироф этилган. У ерда савдо маркази, кўплаб ёпиқ боғлар, жумладан, капалаклар маркази ва дунёдаги энг катта шаршара мавжуд. Аэропортда спа-салонлар, меҳмонхоналар, бадиий санъат асарлари кўргазмалари, музей, кинотеатр ва динозаврларнинг тематик боғи жойлашган.

Рейтингда иккинчи ўринни Қатарнинг Ҳамад халқаро аэропорти эгаллади. Бундан ташқари, у аэропортдаги энг яхши шопинг ва Яқин Шарқдаги энг яхши аэропорт йўналишларида ҳам мукофотларни қўлга киритди. Рейтингдаги 3-6-ўринларни Осиёдаги аэропортлар эгаллаган. «Бу минтақа ҳаво транспортини такомиллаштириш масаласида Шимолий Америка ва Европани ортда қолдираётганини англатади», — дейилади хабарда.

Токио халқаро аэропорти учинчи ўринга лойиқ кўрилиб, дунёдаги энг тоза аэропорт сифатида тан олинган. Ундан кейинги ўринларни Сеулдаги Инчҳон, Токионинг шарқий қисмидаги Нарита ва Ҳонгконг аэропортлари эгаллади.

Топ-20 аэропортлар қаторига Европанинг тўққизта ҳаво бандаргоҳи киритилди. Париждаги Шарл де Голл аэропорти кетма-кет учинчи йил Европанинг энг яхши аэропорти дея тан олинмоқда.

Истанбул аэропорти эса оилавий саёҳатлар учун энг қулай аэропорт сифатида рейтингда 14-ўринни эгаллади. Шунингдек, рўйхатдан Ванкувер, Вена, Мелбурн, Тюбу, Копенгаген, Амстердам ва Баҳрайн аэропортлари ҳам ўрин олди.