Трамп божлар АҚШга муаммо келтириши мумкинлигини тан олди

Шунга қарамай, Трампнинг таъкидлашича, ўтиш даврида йўқотишлар бўлади, муаммолар ҳам бўлади, аммо пировард натижада ҳаммаси ажойиб бўлади.

«Биз узоқ йиллар илгари амалга оширилиши керак бўлган ишни қайта бошлаяпмиз. Биз буни назоратсиз қолдирдик ва айрим давлатларга бизнинг ҳисобимиздан бойиш имконини бердик», — деган Трамп.

У бундай ҳолатни яна такрорлашга йўл қўймаслигини таъкидлади. Трампнинг айтишича, янги божлар жорий этилгандан сўнг, АҚШ кунига тахминан 3,5 млрд доллар ишлаяпти.

Трамп бундан олдин 75 дан ортиқ давлатлар савдо бўйича муросалар ҳақида музокараларга тайёр эканини маълум қилган эди. Унга кўра, ушбу давлатлар унинг «жиддий тавсияси»га қулоқ тутган ҳолда жавоб чораларидан воз кечган. Шу сабабли уларга нисбатан 50 фоизгача етиши мумкин бўлган юқори божлар ўрнига вақтинча 10 фоизлик ставка қўлланади. Трампнинг таъкидлашича, у «зарар етказиш лозим бўлмаган ва музокара олиб боришни истовчи» давлатларга зарар етказмоқчи эмас.

Шу сабабли у барча давлатлар учун импорт божларининг оширилишини 90 кунга тўхтатиб туриш тўғрисида қарор чиқарди, фақатгина Хитойдан ташқари.

Шу ҳафта бошида Трамп Хитойдан келадиган импортга жами 104 фоизга тенг божлар жорий этди. Бунинг ортидан Пекин АҚШ товарларига божларни 84 фоизгача оширди. Жавоб тариқасида Трамп Хитойга нисбатан божларни 125 фоизгача кўтарди.

Кейинчалик Оқ уйда аниқланишича, Хитой учун божлар ставкаси «амалда 145 фоизни» ташкил қилмоқда: бу ставка бошланғич 10 фоиз, фентанил наркотиги етказиб беришга кўмакда айбловлар билан боғлиқ яна 10 фоиз ва жавоб тариқасида жорий этилган 125 фоизлик божлардан иборат.

Пекин эса бундай вазиятда «қўл қовуштириб ўтирмаслигини» ва Вашингтон билан бож урушида иштирок этишдан қўрқмаслигини маълум қилди.