Етакчи институтлар Германиянинг иқтисодий ўсиш прогнозини пасайтирди

Етакчи институтлар Германия иқтисодий ўсиши бўйича прогнозларини пасайтирди. 10 апрел, пайшанба куни эълон қилинган иқтисодиёт ҳолатининг қўшма диагнозига кўра, Германия ялпи ички маҳсулоти жорий йилда 2024 йил кузида кутилаётган 0,8 фоиз ўрнига атиги 0,1 фоизга ўсади.

2026 йилда ЯИМ ўсиши 1,3 фоизни ташкил этади. Инфратузилма ва мамлакат қуролли кучларини қайта жиҳозлаш учун миллиард долларлик сармоя пакети бунга ҳисса қўшиши кутилмоқда.

Эссендаги Рейн-Вестфалия иқтисодий тадқиқотлар институти (RWI) иқтисодий эксперти Торстен Шмидтнинг айтишича, геосиёсий вазият ва АҚШнинг протекционистик савдо сиёсати «Германиядаги шусиз ҳам таранг бўлган иқтисодий вазиятни янада кучайтирмоқда». Вашингтоннинг фақат пўлат, алюминий ва автомобил импортига божлари жорий ва келгуси йилда ЯИМ ўсишини 0,1 фоизга камайтириши мумкин, дея тушунтирди у.

АҚШ президенти Доналд Трампнинг жорий этилиши 90 кунга кечиктирилган бошқа кўплаб товарларга 20 фоизлик божларни эълон қилиши «салбий таъсирни икки баравар ошириши мумкин», дея огоҳлантирди иқтисодчи. Оқ уй иқтисодий сиёсатининг ўзига хос таъсирини олдиндан айтиш қийин, чунки бугунги глобаллашган иқтисодиётда савдо тарифлари ҳеч қачон юқори бўлмаган, деди Шмидт. Бундан ташқари, немис компаниялари халқаро рақобатга дуч келмоқда, биринчи навбатда, Хитойдан, дея қайд этиб ўтди RWI вакили.

Германиянинг иқтисодий ўсиш салоҳияти малакали кадрлар етишмаслиги ва бюрократик тўсиқлар билан ҳам чекланган, дейилади ҳисоботда. Биргина давлат харажатларини кўпайтириш билан ҳал қилиб бўлмайдиган таркибий муаммолар ислоҳотларни янада долзарб қилади, дейилади ҳисоботда. «Масалан, иш ҳақи билан боғлиқ бўлмаган меҳнат харажатларининг янада кескин ошишига йўл қўймаслик учун ижтимоий тизимни демографик ўзгаришларга мослаштириш керак», дея давом этди у.