АҚШ смартфонлар ва компьютерларни ўзаро божлардан озод қилди

12 апрель куни АҚШ божхона ва чегара қўриқлаш хизмати ҳукумат томонидан жорий қилинган бож тарифлари таъсир этмайдиган товарлар рўйхатини эълон қилди. Бу ҳақда Bloomberg хабар берди.

Жумладан, смартфонлар, ноутбуклар, қаттиқ дисклар, компьютер процессорлари, хотира чиплари ва яримўтказгичларни ишлаб чиқариш учун ишлатиладиган машиналар учун истиснолар қилинган.

Рўйхатга киритилган товарларга Хитой учун 145 фоизлик тариф ва дунёнинг деярли барча мамлакатлари учун асосий 10 фоизлик бож қўлланилмайди.

Оқ уй изоҳ ҳақидаги Bloomberg сўровига жавоб бермади.

Таъкидланишича, Қўшма Штатларда ишлаб чиқарилмайдиган, аммо оммавий бўлган электроника товарлари учун истисно қилинган. Ҳукумат қарори истеъмолчиларни «нархларнинг даҳшатли ўсишидан» ҳимоя қилиши ва Apple, Samsung ва Taiwan Semiconductor Manufacturing каби компанияларга ёрдам бериши мумкин.

Аввалроқ, Доналд Трамп АҚШ чет эл чипларига тарифлар жорий қилмоқчи эканлигини айтди, бироқ бу ҳали амалга ошмади. Трампнинг тармоқ тарифлари ҳозир 25 фоиз қилиб белгиланган, бироқ яримўтказгичлар ва тегишли маҳсулотлар учун ставка қандай бўлиши номаълум.