Украинларга асир тушган хитойликлар иштирокида матбуот анжумани ўтказилди

Асирлардан бирининг айтишича, у Россияга яраланган ҳарбийлар учун реабилитолог сифатида ишга жойлашиш мақсадида келган. Иккинчиси эса саёҳат баҳонасида РФга келган ва «озгина пул ишлаб олмоқчи бўлган».

Фото: Украинская правда

Хитойнинг Россия томонида жанг қилиб, украиналик ҳарбийлар томонидан асирга олинган икки фуқароси Киевда матбуот анжумани ўтказди. Унда асирлар урушга алдов йўли билан жалб қилингани ҳақида сўзлаб берди.

Ван Гуанцзюннинг айтишича, у россиялик рекрутер (ёлловчи) билан яраланган ҳарбийлар учун реабилитолог сифатида ишга жойлашишга келишган. Ўзининг айтишича, у Россияга келганида «армияга тушиб қолган ва унда танлов бўлмаган».

Чжан Ренбонинг маълум қилишича, у аввалига Россияга саёҳат учун келган, кейин эса «озгина пул ишлаб олишга қарор қилган». Хитой фуқароси айтишича, унга қурилишда иш таклиф қилишган, аммо кейин «бошқа ишлар бошланган» ва у «ҳеч нарса қила олмай қолган».

Чжан ва Ван Хитой ҳукумати тузилмаларига ҳеч қанақа алоқалари йўқлигини билдирди.

Украина қуролли кучлари Хитойнинг икки нафар фуқаросини асирга олгани тўғрисида президент Володимир Зеленский 8 апрел куни маълум қилганди. У Киев хитойликларни Россияда асирда сақланаётган украиналикларга алмашишга тайёр эканини айтган.

Хитой Ташқи ишлар вазири мамлакат ўз ҳарбийларини Украинага юбормаганини расман маълум қилди.

Эслатиб ўтамиз, 2023 йилда Россия армияси тарафида туриб Ҳиндистоннинг ўнлаб фуқаролари ҳам жанг қилаётгани маълум бўлганди. Кейинроқ ҳукумат аралашуви билан ватанига қайтган ҳиндлар Россияга алдов йўли билан чақирилиб, ҳарбий шартномалар тузишга мажбурланганини сўзлаб берганди.

#Украина #Хитой #асирлар