АҚШ божларни Швейцария туфайли уч ойга кечиктиргани айтилмоқда

Bloomberg агентлигининг хабар беришича, айнан шу суҳбат Трампнинг савдо тўқнашувида позициясини юмшатиш тўғрисидаги қарорини қабул қилишда ҳал қилувчи омиллардан бири бўлган.

Бир вақтнинг ўзида ҳам молия вазири, ҳам мамлакат президенти Келлер-Зуттер 9 апрел куни бўлиб ўтган суҳбатни ижтимоий тармоқда «очиқ ва конструктив» деб атади. У Берннинг икки томонлама савдо бўйича позициясини баён этгани ва АҚШ манфаатларини ҳисобга олиш бўйича йўлларни белгилаганини таъкидлади. Томонлар яқин вақтда музокараларни давом эттиришга келишиб олган.

Bloomberg таҳлилига кўра, Швейцария президенти ярим соат ичида гапнинг моҳиятига ўтган ва айнан шахсан Трампнинг молиявий манфаатларига таъсир қиладиган фактларга урғу берган.

Келлер-Зуттер мамлакатининг АҚШ иқтисодиётидаги ролига эътибор қаратган: Швейцария Америкадаги инвестициялар бўйича 6-ўринда, ишлаб чиқариш соҳасида — 4-ўринда, тадқиқот ва ишланмалар соҳасида эса — 1-ўринда туришига урғу берган.

«Мен буни президент Трампга тушунтирдим — ва ўйлайман, бу қарор қабул қилинишда аҳамият касб этди», — деган у.

Аввалроқ Трамп Швейцариядан келадиган барча товарларга 31 фоизлик бож жорий этиш ниятида эди — бу Европа Иттифоқига нисбатан белгиланган 20 фоиздан ҳам юқори. Бу қарор Бернда жиддий хавотир уйғотди: Швейцария иқтисодиёти экспортга йўналтирилган ва бундай юқори тарифлар унинг асосий тармоқларига жиддий зарба бўларди.

Бундан ташқари, «Trump Watches» брендининг айрим люкс соат моделлари айнан Швейцарияда ишлаб чиқарилиши маълум бўлди. Улар орасида 2999 долларлик хронограф ва 100 минг долларлик Tourbillon модели бор. Божлар ушбу ишлаб чиқаришни банкротлик бўсағасига олиб келиши мумкин эди.

Шу билан бирга, Швейцариядан АҚШга олиб кирилаётган олтин ҳажми кескин ошган, дунёда эса қимматбаҳо металл нархлари тарихий рекордларни янгилаётган бир пайтда, Швейцария божларни тўхтатишга эришди.

Энди бу қанчагача давом этади, деган савол вужудга келмоқда: Доналд Трамп 3 ойдан сўнг божларни қайта жорий этмайдими?