Хитой АҚШ Миллий хавфсизлик агентлигининг уч нафар ходимини ҳибсга олишга ордер берди

Улар Ҳарбинда ўтказилган IX қишки Осиё ўйинларининг муҳим тизимларига киберҳужумлар уюштиришда гумонланмоқда.

Фото: Bloomberg

Ҳарбин полицияси уч нафар АҚШ фуқаросига нисбатан қидирув эълон қилиб, уларни ҳибсга олишга ордер берди. Хитой расмийларининг таъкидлашича, улар Миллий хавфсизлик агентлиги (МХА) ходимлари бўлиб, феврал ойида Ҳарбинда ўтказилган IX қишки Осиё ўйинларининг муҳим тизимларига киберҳужумлар уюштирилишига алоқадор. Бу ҳақида Ҳарбин жамоат хавфсизлиги муниципал бошқармаси баёнотига таяниб South China Morning Post хабар берди.

Идора қидирувга берилган америкаликлар исмини эълон қилган: Кэтрин Э. Уилсон, Роберт Ж. Снеллинг ва Стивен У. Жонсон. Ҳарбин полицияси маълумотларига кўра, ушбу шахслар МХАнинг компютер операциялари бўлимида (S32) ишлайди ва «муҳим ахборот инфратузилмалари ва Huawei каби компанияларга уюштирилган киберҳужумларда бир неча бор иштирок этган».

Таъкидланишича, киберҳужумлар ёпиқ маълумотларни сақлаш тизимлари, жумладан, мусобақа иштирокчиларини рўйхатга олиш, спортчиларнинг шахсий ва тўлов маълумотлари сақланган тизимларга таъсир қилган.

Идоранинг аниқлик киритишича, киберҳужумларнинг энг юқори нуқтаси 2025 йил 3 феврал санасига — биринчи ҳоккей учрашуви ўтказилган вақтга тўғри келади. Гумонланувчилар ёки улар жойлашган ҳудудга оид бошқа ҳеч қандай қўшимча маълумотлар келтирилмаган. Шу билан бирга, идора гумонланувчиларни қўлга олишда ёрдам берадиган маълумотлар учун мукофот ваъда қилган.

#АҚШ #Хитой #киберҳужумлар