ЕИ АҚШ тарифларига қарши жавоб чораларини қабул қилишни вақтинча тўхтатди

АҚШ Европа Иттифоқи учун «ўзаро тарифлар»ни кечиктиргандан сўнг, Европа Иттифоқи АҚШ маҳсулотларига божхона тўловлари бўйича жавоб чораларига пауза эълон қилди.

Фото: Globallookpress

«Европа Иттифоқи АҚШ ва ЕИ ўртасидаги музокаралар учун вақт ва жой бериш мақсадида АҚШнинг асоссиз савдо тарифларига жавобан кўрилган чораларни тўхтатди», — дейилади Европа комиссиясининг 14 апрел, душанба кунги матбуот-релизида.

Таъкидланишича, ўтган ҳафта Еврокомиссия раҳбари Урсула фон дер Ляйен томонидан эълон қилинган ЕИнинг жавоб чораларини қабул қилишдаги пауза 15 апрелдан кучга киради.

«Европа Иттифоқининг АҚШнинг Европа Иттифоқи пўлат ва алюминий импортига божлари билан боғлиқ режалаштирилган жавоб чораларини 90 кунгача тўхтатувчи ушбу қарор АҚШнинг ўзаро тарифларни 90 кунга кечиктиришига жавобан қабул қилинди», дейилади ҳужжатда. Таъкидланишича, умумий ҳисобда тўхтатилган ЕИ қарши чоралари АҚШнинг 21 миллиард евролик экспортига тегишли.

Шу билан бирга, АҚШнинг Европа Иттифоқидан импорт қилинадиган маҳсулотларга божларни ошириши муносабати билан қабул қилиниши мумкин бўлган Европа Иттифоқининг жавоб чораларини тайёрлаш бўйича ишлар давом этмоқда. «Европа Иттифоқи АҚШ тарифларини асоссиз ва зарарли деб ҳисоблайди, бу ҳар икки томон учун ҳам, жаҳон иқтисодиётига ҳам иқтисодий зарар етказиш хавфи бор», — дейилади пресс-релизда.

Қайд этилишича, 14 апрел куни Еврокомиссия иккита ҳужжат қабул қилган: АҚШ божларини оширганлиги муносабати билан ЕИ томонидан жавоб чораларини жорий этиш ва бу чораларнинг кучга киришини 2025 йил 14 июлгача кечиктириш.

#АҚШ #ЕИ