Трампнинг тинчлик режаси бўйича Украина ва Россияга нима таклиф қилингани маълум бўлди

Қўшма Штатлар Украинадаги урушни тугатиш бўйича «тинчлик режасини» тақдим этди, унда АҚШ Қримни Россиянинг бир қисми сифатида тан олиши ва 2022 йилдаги босқиндан кейин эгалланган деярли барча ҳудудлар устидан Россия назоратини норасмий тан олиши қайд этилган. АҚШ Лондондаги йиғилишда бу таклифгаУкраинанинг жавобини кутмоқда, деб ёзди Axios.

Украина ҳукуматига яқин манбанинг нашрга айтишича, расмий Киев бу таклифни Россия манфаатларига жуда мос, деб ҳисоблайди.

«Таклифда Россия қандай моддий фойда олиши жуда аниқ кўрсатилган, бироқ Украина нима олиши ноаниқ ва умуман кўрсатилган», деди манба.

Украина Трамп таклифига кўра нима олади?

1. «Ишончли хавфсизлик кафолати», бу Европа давлатларининг махсус тинчликпарвар гуруҳини ва, эҳтимол, ҳамфикр бўлмаган бошқа мамлакатларни ҳам ўз ичига олади. Бироқ ҳужжатда бу тинчликпарвар операция қандай ишлаши аниқ эмас ва АҚШ иштироки ҳақида ҳеч нарса айтилмаган.

2. Харков вилоятининг Россия томонидан босиб олинган кичик бир қисми қайтарилади.

3. Украина жанубидаги айрим ҳудудларда фронт чизиғи бўйлаб оқиб ўтадиган Днепр дарёсига тўсиқсиз киради.

4. Компенсация ва қайта қуришда ёрдам. Бироқ ҳужжатда молиялаштириш қаердан келиши айтилмаган.

5.Запорожие атом электр станцияси Украина ҳудуди ҳисобланади, лекин Қўшма Штатлар томонидан бошқарилади ва энергия ҳам Украина, ҳам Россия билан таъминланади.

6. Ҳужжатда, шунингдек, қазилма бойликлар бўйича АҚШ-Украина шартномаси ҳам тилга олинган.

Россия Трампнинг таклифига кўра нима олади?

1. АҚШ Қримнинг Россияники эканини «де-юре» тан олади.

2. Россия томонидан Луганск вилояти, Донецк, Херсон ва Запорожие вилоятларининг ишғол қилинган қисмлари «де-факто» тан олинади.

3. Украинанинг НАТО аъзоси бўлмаслиги ҳақидаги ваъда, бироқ, Украина Европа Иттифоқининг бир қисми бўлиши мумкин.

4. 2014 йилдан бери жорий қилинган санкциялар бекор қилинади.

5. АҚШ билан иқтисодий ҳамкорлик кенгайтирилади, айниқса, энергетика ва саноат соҳаларида.

Бироқ, Axios фикрига кўра, Украина бу режани Лондондаги учрашувда муҳокама қилишни режалаштирмаган.

«Сўнгги 24 соат ичида украиналиклар Лондонда бўлиб ўтадиган учрашувлар чоғида Трампнинг тинчлик режасини эмас, балки 30 кунлик ўт очишни тўхтатиш келишувини муҳокама қилмоқчи экани ҳақида аломатлар бор эди», деди АҚШ расмийларидан бири.

Унга кўра, АҚШ Давлат котиби Марко Рубио Лондонга бормасликка қарор қилган. Унинг ўрнига АҚШ делегацияси Буюк Британия ва Украинадаги ҳамкасблари билан музокараларни давом эттиради.

Аввалроқ, АҚШ президенти Доналд Трамп Украина ва Россия шу ҳафтадаёқ «келишув» тузиши мумкинлигини айтган эди.