29 апрел янгиликлари: Ўзбекистонда рўй берган муҳим воқеа ва ҳодисалар

Хоразмда ўқувчи қизни калтаклаган директор, АҚШда 30 йилга қамалган ўзбек тракчи, тугатилаётган сектор бошқаруви ва педагогика олийгоҳларнинг ёпилаётган сиртқи бўлимлари — ўтган кун давомида Kun.uz’да ёритилган долзарб ва муҳим Ўзбекистон янгиликлари билан таништирамиз.

{Yii::t(}

Ўтказиб юбориш 6s

Ўтказиб юбориш

Мактаб директори ўқувчи қизни калтаклади

Хоразм вилояти Қўшкўпир туманидаги 14-сонли мактаб директори дарс пайтида синфхоналарига кириб, синфдаги бир неча қизларни сочини йиғмагани учун танбеҳ берган ва ўқувчи қизни калтаклаган.

Ҳодиса 7 апрел куни содир бўлган. Мактаб директори ўқувчининг сочидан тортиб, у билан жанжаллашган. Тасвирлар ижтимоий тармоқларда тарқалгач, вилоят Мактабгача ва мактаб таълими бошқармаси расмий баёнот берди.

Маълум қилинишича, директор педагогга хос бўлмаган ҳаракатлари учун ҳайфсан жазосини олган ва маъмурий жавобгарликка тортилган. Мазкур ҳолат бўйича мутасаддиларга тегишли чоралар кўрилган.

Ҳукумат таълим соҳасида педагог этикасига риоя қилиш муҳимлигини таъкидламоқда. Айниқса, ўқувчиларга нисбатан зўравонликка мутлақо йўл қўйилмаслиги керак.

Педагогика олийгоҳларида сиртқи бўлимлар ёпилади

Президент фармонига кўра, 2025-2026 ўқув йилидан бошлаб педагог кадрлар фақат кундузги ва кечки таълим шаклида тайёрланади, сиртқи таълим қабуллари бекор қилинади. Нодавлат таълим фаолияти Мактабгача ва мактаб таълими вазирлиги хулосаси асосида лицензияланади.

Шу билан бирга, хорижий мутахассислар иштирокида халқаро таълим дастурлари жорий этилган йўналишларда дарс бериш учун профессор-ўқитувчилар танлов асосида қабул қилинади. 2026 йил 1 сентябрдан эса педагогика техникумларига халқаро дастурлар босқичма-босқич татбиқ этилади.

Фармонга мувофиқ, Тошкент давлат педагогика университети негизида Низомий номидаги Ўзбекистон миллий педагогика университети ташкил этилади. Университет бошқарув тизими «Янги Ўзбекистон» университети тажрибаси асосида тубдан такомиллаштирилади. Мавжуд 14 та факултети мақбуллаштирилиб, 6 та педагогика олий мактаблари ташкил этилади.

Мазкур ислоҳотлар педагог кадрлар тайёрлаш сифатини ошириш ва таълим соҳасини халқаро стандартларга мувофиқлаштиришга қаратилган.

Вилоят, шаҳар ва туманларда секторлар бошқаруви тугатилди

Прокурор, ички ишлар ва солиқ органлари раҳбарлари секторлар фаолияти бўйича вазифалардан озод этилди. Бу ҳақда президент Шавкат Мирзиёевнинг коррупцияга қарши курашиш тизимини такомиллаштиришга қаратилган фармонида белгиланди.

Янги тартибга кўра, секторларни бошқариш бош вазир ўринбосарлари ва Ўзбекистон маҳаллалари уюшмаси ҳамда унинг ҳудудий бўлинмалари зиммасига юклатилади. Вазирлар Маҳкамаси икки ой муддатда тегишли қарор лойиҳасини тайёрлаши лозим.

Президент Мирзиёев март ойидаги йиғилишда прокуратура, ички ишлар ва солиқ органлари раҳбарларини сектор ишларидан озод қилиш заруратини таъкидлаган эди. Президент сўнгги йилларда бу тизим ҳудудларни ривожлантиришда фойда берган бўлса-да, баъзи соҳаларда ишларни сустлатганини танқид қилган эди.

Шунингдек, давлат раҳбари прокуратура, ички ишлар, солиқ раҳбарларини сектор ишидан озод қилиш бу — эски даврга қайтиб, аҳоли ва тадбиркорларга ҳар қадамда тўсиқ, коррупцияга шароит яратиш дегани эмаслигини таъкидлаган эди.

АҚШда ўзбек тракчи 30 йилга қамалди

Америкада трак ҳайдаган ва қасддан авария содир этиб, 5 кишининг ўлимига сабабчи бўлган ўзбек йигит 30 йилга қамалгани ҳақида хабарлар тарқалмоқда. Тасвирлардан 2023 йилнинг 10 октябрида содир бўлган автоҳалокат айнан қайси штатда рўй бергани маълум эмас. Шунингдек, тракчининг фуқаролиги айнан Ўзбекистон экани ҳам маълум эмас, шуниси аниқки, автоҳалокатдан сўнг ўзбек тилида гапирган.

Автоҳалокатда трак ҳайдовчиси юк машинасидан ўзиш учун белгиланган қоидаларга кўра қувиб ўтиш мумкин бўлган жойда «обгон»га чиққан, бироқ қувиб ўтиш тақиқланган қўш сидирға чизиқ бошлангунга қадар ўз қаторига қайтишга улгурмаган.

Рўпарадан келаётган машинага кўзи тушгач, ўз қаторига қайтаман деганда ёнма-ён ҳаракатланаётган юк машинаси билан ёнбошдан урилган ва рўпарадан келаётган енгил машина билан тўқнашиб кетган.

Енгил машинада беш кишидан иборат оила кетаётган бўлган. Олд ўриндиқлардаги эр-хотин ўлган ва уларнинг орқа ўриндиқдаги уч боласи тирик қолган. Суд қарори билан йигит 30 йилга қамалгани айтилмоқда.

Экстремизмни молиялаштириш — жиноят

Ўзбекистонда экстремизмни молиялаштириш учун жиноий жавобгарлик белгиланади. Бу президентнинг 21 апрелдаги фармонида кўзда тутилган. Қонун лойиҳаси 2025 йил май ойигача тайёр бўлади.

Ҳужжатда жиноий даромадларни легаллаштириш, инсайдер ахборотдан фойдаланиш ва қимматли қоғозлар бозорида ҳийла-найранг содир этиш ҳолатларини жазолаш механизмлари халқаро стандартларга мослаштирилиши назарда тутилган.

Бунда қилмишнинг ижтимоий хавфлилик даражасига қараб жазо чоралари қайта тақсимланади. Ҳужжатни ишлаб чиқиш Бош прокуратура, Адлия вазирлиги ва Коррупцияга қарши курашиш агентлигига топширилди.

Аввалроқ оммавий тартибсизликларни молиялаштириш ва тайёргарлик кўрганлик учун жиноий жавобгарлик 2025 йил 27 мартдан кучга кирганди.