Open AI асосчиси кўз гавҳари орқали шахсни тасдиқлайдиган лойиҳани ишга туширди

Open AI асосчиси Сэм Альтман ва унинг Tools for Humanity стартапи Қўшма Штатларда янги криптовалюта World (WLD) сотилишини эълон қилди. Уни кўз гавҳарини сканерлаш эвазига олиш мумкин, унинг асосида ноёб hash-код шакллантирилади. Ушбу код World ID профилининг эгаси сунъий интеллект эмас, балки инсон эканлигига далил бўлиб хизмат қилади.

Дастлаб Worldcoin деб номланган бу ташаббус оддий мақсадни кўзлайди: интернет тармоғида сунъий интеллектни одамлардан ажратиш қийин бўлиб бораётган шароитда ким инсон, ким алгоритм эканини аниқлайдиган ишончли тизимлар керак.

World асосчилари бундай тизимнинг келажаги порлоқ эканига ишонади. Масалан, ундан мобил тўловларни амалга ошириш учун фойдаланиш мумкин. Компания тез орада WLD криптовалютасини фиат валютасига айлантириш имконини берувчи Visa дебет картасини чиқаришни режалаштирмоқда.

Бундан ташқари, World ID орқали машҳур онлайн тизимлар - Telegram, Shopify, Discord ва бошқаларда шахсни тасдиқлаш имконияти мавжуд. Бу тизимларда ҳам одамларни сунъий интеллектдан ажратиш айниқса муҳим.

Кўз гавҳарини сканерлаш учун Orb деб номланган шарсимон қурилма ёки Orb Mini деб номланган смартфон кўринишидаги гаджет қўлланилади. Иккаласи ҳам глобал маълумотлар базасида ноёб IrisCode идентификаторини яратиш ва сақлашга қодир.

Лойиҳа, албатта, баҳсли. Аммо унда аллақачон 26 миллион одам рўйхатдан ўтди ва уларнинг 12 миллиони тасдиқланган. Лойиҳа асосан ривожланаётган бозорларга қаратилган бўлиб, технология айнан у ерда синаб кўрилгани таъкидланмоқда.