Трамп президент самолётини алмаштиришга қарор қилди

АҚШ президенти Доналд Трамп янги президент самолёти учун муқобил вариантларни кўриб чиқмоқда, бош пудратчи Boeing эса самолётларни етказиб беришни кечиктирмоқда, деб ёзди The Wall Street Journal (WSJ) манбаларга таяниб.

Трамп биринчи президентлик даврида эскирган Boeing 747 Air Force One ўрнига иккита янги самолётни буюрган эди. Буюртма бўйича Boeing компанияси 3,9 миллиард долларлик шартномани ютиб олди.

Самолётлар 2024 йилгача тайёр бўлиши керак эди, бироқ етказиб бериш муддати биринчи самолёт учун 2027 йилга, иккинчиси учун эса 2028 йилгача сурилди. Бу Трамп президентлик муддатининг охирги йили ҳисобланади.

Boeing компаниясидан ҳафсаласи пир бўлган Трамп L3Harris компаниясига Қатар ҳукумати томонидан фойдаланилган Boeing 747 самолётини таъмирлашни топширди, деб хабар берди WSJ. Шу билан бирга, Boeing иккита янги самолётни ишлаб чиқаришда давом этади. Бироқ, компания мураккаб дизайн муаммолари туфайли янги президент самолётларини 2035 йилгача етказиб бера олмайди, дея хабар берди газета манбалари.

Сайловда ғалаба қозонганидан сўнг, Трамп Boeing раҳбарлари билан бир қатор музокараларни ўтказди. Февраль ойида президент эски Boeing самолётини қайта жиҳозлаб, биринчи рақамли борт сифатида фойдаланиши мумкинлигини айтди. Шу билан бирга, у Airbus компанияси самолётларини сотиб олиш имкониятини рад этди, бироқ бошқа хориж компаниясидан харид қилиш мумкинлигини тан олди.

Boeing сўнгги йилларда катта инқирозларга дуч келмоқда. Компания обрўсига ўзи ишлаб чиқарган фуқаролик авиалайнерларидаги нуқсонлар ҳам путур етказган. Мисол учун, 2024 йил январида Boeing 737 МАХ 9 самолётининг эшиги узилиб тушди ва салонда босим пасайиб кетди. Boeing текширувни бошлади ва бу моделдаги самолётларнинг бир қисми вақтинчалик фойдаланишдан чиқарилди. Шунингдек, компания мижозлари ҳам сифатсиз қисмлар етказиб берилаётганидан шикоят қилишган эди.