Ўзбекистонда миллий туризм ягона платформаси ишлаб чиқилмоқда

Нашрда қайд этилганидек, сўнгги йилларда Ўзбекистоннинг туризм экспорти 1,6 карра ошиб, 3 миллиард 500 миллион долларга етди, бу соҳада 2 мингдан ортиқ янги тадбиркор иш бошлади. Ўтган йили хорижий сайёҳлар ташрифи илк бор 10 миллиондан ошди.

"Ҳудудларда туризм ва сервис инфратузилмаси жуда тез ривожланяпти. Хусусан, ўтган 8 йилда 6 миллиард 500 миллион доллар сармоя киритилиб, 130 мингта меҳмон ўрни очилган. Бугунги кунда 20 та туризм қишлоғи фаолият юритяпти. Паркент туманининг "Олтин бел" чўққисида халқаро даражадаги янги тоғ-чанғи зонаси барпо этиляпти", – дейилган мақолада.

Таъкидланганидек, йиғилишда жойлардаги имкониятларни юзага чиқариб, туризм йўналишларини кўпайтириш, сайёҳларга шароитларни кенгайтириш чора-тадбирлари муҳокама қилинди. Мутасаддиларга шу каби 36 та туман ва шаҳарни этно, гастрономик, тиббий, экстремал, маданий-тарихий, зиёрат, қишки ва агротуризм асосида ривожлантириш бўйича дастур ишлаб чиқиш топширилди.

Озарбойжон ОАВ айни пайтда Ўзбекистонда миллий туризм ягона платформаси ишлаб чиқилаётгани ҳақида ёзган. Энди унга электрон виза бериш, чипта олиш жараёнлари ҳам уланади. Шунингдек, барча тарихий обидаларга кириш имконини берадиган "ягона туристик карта" жорий қилинади.

Йиғилиш кун тартибидаги иккинчи масала – хорижий давлатлар билан ҳамкорликдаги инвестициявий лойиҳалар таҳлили бўлди, деб таъкидланган.

"Бу йил биринчи чоракнинг ўзида Ўзбекистон президентининг Бирлашган Араб Амирликлари, Малайзия, Кувайт ва Францияга ташрифлар чоғида 39 миллиард долларлик 178 та лойиҳа бўйича келишувларга эришилди. Яқинда Самарқандда ўтган саммитда Европа Иттифоқи Марказий Осиёга 12 миллиард евро ажратишини маълум қилди", – деб ёзган 525.az.