Руминиядаги сайловларнинг биринчи босқичида ўта ўнг сиёсатчи ғалаба қозонди

Расмий дастлабки маълумотларга кўра, миллатчилик кайфиятидаги партия етакчиси Жорже Симион 40,85 фоиз овоз олган. Бухарест мэри Никушор Дан ҳам 20,96 фоиз овоз билан такрорий президентлик сайловларининг иккинчи босқичига чиқди.

Фото: Getty Images

Руминияда 5 май куни бўлиб ўтган такрорий президентлик сайловларининг биринчи босқичида «Руминларни бирлаштириш учун иттифоқ» румин миллатчи партияси етакчиси Жорже Симион ғалаба қозонди. Марказий сайлов комиссияси маълумотларига кўра, бюллетенларнинг 99,8 фоизи санаб чиқилгач, у 40,85 фоиз овоз тўплаган. Сиёсатчи мутлақ кўпчиликни қўлга кирита олмади, шунинг учун сайловнинг иккинчи босқичи бўлиб ўтади.

Симионнинг рақиби ўнг марказчи «Руминияни қутқариш иттифоқи»нинг асосчиси, 20,96 фоиз овоз олган Бухарест генерал мэри Никушор Дан бўлади.

Биринчи турда учинчи ўрин 20,15 фоиз овоз олган «Руминия, олдинга» марказчилар альянси томонидан қўллаб-қувватланган Крин Антонескуга насиб этди. У иккинчи босқичга чиқа олмади.

Мамлакат Марказий сайлов комиссияси маълумотларига кўра, биринчи турда 9,57 миллионга яқин киши ёки овоз бериш ҳуқуқига эга Руминия фуқаролари умумий сонининг 53,2 фоизи овоз берган. Хориждаги сайлов участкаларида 973 минг киши овоз берди.

4 май куни Симион агар у такрорий президентлик сайловларида ғалаба қозонса, аввалги сайловларнинг биринчи босқичида ғалаба қозонган ҳокимиятдан четлатилган ўта ўнг сиёсатчи Калин Жоржеску ҳокимиятга қайтиши мумкинлигини айтди, бироқ унинг натижаси бекор қилинди.