Исроил Ғазога яна гуманитар ёрдам етказишга рухсат берди

«Асосий озиқ-овқат захиралари очарчилик бўлмаслигини таъминлаш учун Исроил армияси тавсиясига кўра таъминланмоқда», деди Нетаняху идораси.

Фото: Eyad Baba/AFP

Исроил ҳукумати 19 май, душанбага ўтар кечаси Ғазо секторига яна бир бор гуманитар ёрдам етказилишига рухсат беришини эълон қилди, кузатувчилар бу ерда акс ҳолда аҳоли кенг кўламли очарчилик хавфи остида қолишини таъкидлади.

«Асосий озиқ-овқат таъминоти очарчилик бўлмаслигини таъминлаш мақсадида Исроил армияси тавсиясига кўра амалга оширилмоқда», — дея Исроил бош вазири Бинямин Нетаняху идораси баёнотидан иқтибос келтирмоқда dpa ахборот агентлиги.

Журналистларнинг эслатишича, Исроил март ойи бошидан бери Ғазо секторига гуманитар ёрдам етказилишига рухсат бермаган. Исроил ҳукуматининг даъво қилишича, бу ҳудудларни назорат қилаётган ҲАМАС аъзолари гуманитар ёрдамни қайта сотади ва шу тариқа қурол-яроғ етказиб беришни молиялаштиради.

Нетаняху идорасига кўра, янги механизм ишлаб чиқилгунга қадар гуманитар ёрдам Ғазо секторига одатий каналлар орқали етказилиши керак бўлади. Шу билан бирга, Исроил энди улар жангчилар қўлига тушмаслиги учун чоралар кўришга ваъда берди.

Walla.co.il порталига кўра, Жаҳон озиқ-овқат дастури (World Food Programme - WFP) ва World Central Kitchen ташкилоти Ғазо секторига гуманитар ёрдам етказади.

Исроилнинг Ғазо секторидаги сўнгги йирик ҳужуми минтақа аҳолисининг аҳволини ёмонлаштириши кутиляпти, сўнгги кунларда Исроил ҳукуматига инсонпарварлик ёрдамини қайта тиклашга чақириқлар тобора кучайиб бормоқда.

#Исроил #Ғазо

2023 йил 7 октябр куни Ғазо бўлгасидаги Ҳамас кучлари Исроилга ёппасига ракета зарбалари бериб, чегарадаги аҳоли пунктларини эгаллай бошлади. Бунга жавобан Исроил қўшинлари Ғазо бўлгасига бостириб кирди. Бу сафарги эскалация аввал кузатилмаган даражада кўп қурбонларга олиб келди.